Coliflor con crema de cacahuete

Bo día, bolboreteirxs! Que tal estades? 

Si, listes ben! Coliflor con crema de cacahuete e tahini! unha mestura sorprendente mais deliciosa! Nós vimos a receita nun vídeo e chamounos tanto a atención que xa a tivemos que recrear, e non defraudou! Todo o contrario!

É ideal como acompañamento dunha carne ou un peixe para así facer unha comida súper completa! Porén, tamén é xenial como prato único cun anaco de pan 😜! Como aquí somos moi de verduras, sempre tentamos ter varios recursos para non tirar unicamente do wok.

Aquí vos deixamos a receita: 

Coliflor con crema de cacahuete 

Ingredientes:

• 1 coliflor
• 2 culleradas de crema de cacahuete
• 1 culleradas de tahini
• O zume dun limón    
  
• 2 culleradas de aceite
• Xenxibre en po
• Pementa moída
• Sal 

Utensilios: unha táboa e un coitelo, unha cunca e un batedor manual e unha fonte apta para o forno.

Elaboración: 

Para comezar, temos de cortar a coliflor en ramas e lavámola moi ben! Secamos con papel de cociña.

De seguir, facemos a salsa. Para iso, mesturamos a crema de cacahuete, o tahini, o zume, o aceite e as especies.

Até que quede unha masa homoxénea.

Mollamos as ramas de coliflor na salsa.

E colocámolas na bandexa do forno.

Enfornamos a 200º, calor arriba e abaixo, durante 25-30 minutos, até que vexamos que está dourada.

E xa estaría lista para comer! 

Agardamos que vos guste e a poñades en práctica! Como vedes, seguimos xogando cos ingredientes e cos sabores para probarmos pratos sorprendentes! 

Xa nos contaredes se vos gusta! E un millón de grazas por estar sempre aí apoiándonos ♥️!

Lémonos, bolboreteirxs 🥰!