Katsu curry

Bo día, bolboreteirxs! Estamos de volta! Como nos tardaba este momento, mais primeiro tiñamos que estabelecer a nosa nova rutina sendo 4 🤭😇☺️, e sacar momentos para cociñar pratos novos non foi doado nun primeiro momento. De feito, un bo consello que vos damos é que as semanas antes fagades comida de máis e conxeledes. Iso salvaravos a vida ao principio. 

Volvemos cunha receita deliciosa, tamén sinxela, que é a nosa versión, ou adaptación, do KATSU CURRY, tamén chamado Katsu Karé, que orixinalmente se fai con porco tonkatsu. Nós decidimos facela con polo e a salsa de curry con boniato e cebola e, a verdade, é que quedou espectacular. Como xa sabedes nós somos amantes do picante, polo que usamos un curry picante, mais iso é totalmente opcional. 

Aquí tedes esta deliciosa receita:

Katsu curry

Ingredientes:

• Arroz branco      

Para as peitugas: 

• Filetes de polo 
• Pan relado 
• Especias: ourego, allo en po, cebola en po, pementa moída e sal 

Para a salsa de curry:

• 1 boniato 
• 1 cebola 
• 500 ml de auga 
• 1 cullerada de pasta de curry 
• AOVE 

Utensilios: unha tixola, unha cunca, un batedor manual, unha táboa e un coitelo. 

Elaboración: 

Para comezarmos, temos de facer o arroz. Para iso, cocemos o arroz en auga ou caldo até que estea no seu punto. Nós fixémolo no microondas. Poñemos o arroz 30 seg no micro e, pasado ese tempo, botamos o líquido e cociñamos 22 min máis. 

De seguir, facemos o curry. Rustrimos a cebola e o boniato, cortados en dados, nunha cullerada de AOVE até que comecen a abrandar. 

Agregamos a auga e cociñamos 10-12 minutos. 

Botamos a cullerada de curry, mesturamos moi ben e cociñamos até que a salsa empece a espesar, 10 minutos máis.

 

Finalmente, facemos as peitugas. Sazonámolas coas especias e pasámolas pola pan relado. Rustrímolas nunha tixola cun chisco de AOVE ou facémolas na fritifeira de aire.  

E chegou a hora de montar o noso prato! Moi fácil, só temos que colocar o arroz, a salsa de curry e a peituga por separado, xa que queda moito máis visual. Servimos, mesturamos e xa estaría listo para comer! Agardamos que vos guste e que poñafes en práctica a receita. 

Como vedes, é moi colorida e vistosa e, ademais, é absolutamente deliciosa 😋! Salvo a pasta de curry, todos os ingredientes son comúns e témolos todos na casa! E o curry xa o encontramos en case todos os supermercados. 

 

Por fin estamos de volta, pronto volvemos con máis receitas! Unha aperta forte, bolboreteirxs 🥰! Lémonos ❤️!