Bo día, bolboreteirxs! Que tal estades? Xa preparados para Semana Santa? Nós desexando ter uns días de descanso e aproveitar para cociñarmos un montón.
Hoxe traémosvos unha receita con base vexetal á que lles podemos engadir os ingredientes que máis nos gusten. Estas opcións parécennos interesantísimas para os adultos mais sobre todo para os peques ampliaren e variaren a súa alimentación a través dun formato que sempre encanta, o da pizza.
Tempo atrás xa temos elaborado bases con diferentes verduras trituradas como o brócoli mais desta volta collemos a materia prima directamente e xogamos por riba. Aquí tedes as nosas últimas creacións.
Boniapizza e berenxepizza
Ingredientes:
- 1 bataca
- 1 berenxena
Recheos:
Utensilios: unha táboa e un coitelo e unha bandexa de forno cuberta con papel vexetal.
Elaboración:
Para comezarmos, temos que lavar moi ben a berenxena e a bataca. Cortamos en lascas e colocámolas nunha bandexa de forno, ou na fritideira de aire, cuberta con papel vexetal. De seguir, salpementamos ao noso gusta e botámosche un chisco de AOVE.
Se as facemos no forno, prequentámolo a 200° e enfornamos 15-17 minutos. E se as facemos na fritideira de aire, a 200° durante 8-9 minutos.
Mentres tanto, cortamos a cebola, o tomate e os champis en láminas moi finas. Cando a berenxena e a bataca estean listas, pasamos a formar as nosas pizzas. Aquí temos que xogar cos ingredientes que máis nos gusten: pavo e queixo; tomate, champis e cebola; salsa de tomate, queixo, pavo e champis; queixo, atún e olivas; tomate e atún… nos botamos queixo a case todas e fomos variando.
Enfornamos de novo, a 200º durante 9-10 minutos máis. Ou na fritideira 5 min.
Servimos e xa estarían listas para comer!
Unha comida deliciosa, variada e chea de cores, onde cada un pode escoller cal é a súa “pizza” preferida, ademais de ser moi saudábel.
Aquí desfrutamos do cociñado e da papatoria en familia así que non podemos máis que recomendar a súa posta en práctica. Aperta forte, bolboreteirxs!
Ningún comentario:
Publicar un comentario