Caldo (ou fumet) de lagostinos

Bo día, bolboreteirxs! Como foi a Noiteboa e o día de Nadal? Pasou o Apapalpador ou Papá Noel, ou sodes máis dos Reis Magos? Nós, como podedes ver, estamos aproveitando para cociñar e, por iso, hoxe vos traemos unha nova receita. 

Os caldos, ou fumets, son elaboracións que nos van axudar a darlle moito sabor a outros pratos, como poden ser arroces, guisos ou salsas, e así podemos potenciar o sabor dos produtos e que sexan moito máis intensos. Nós usamos moito este caldiño para facer arroz negro ou pasta con gambas ou lagostinos; aínda que tamén pode servir para facer salsa de marisco ou algún guiso de peixo para estas festas. 

Queremos compartir hoxe a receita por aquí porque vos pode ser de moita utilidade para o menú de Noitevella ou Aninovo, así que, aquí vai: 

Caldo (ou fumet) de lagotinos

Ingredientes:

• 500 g de cascas de lagostinos
• 1 cebola pequena                    
• 2-3 dentes de allo
• Auga
• AOVE
• Pementa moída
• Sal

Utensilios: unha pota grande, unha táboa e un coitelo, un coador e un batedor potente.

Elaboración:

Para comezarmos,  temos de botar dúas culleradas de aceite no fondo da pota e rustrir a cebola e o allo. Neste caso, non é necesario que vaian demasiado picados xa que despois trituraremos todo. 

Cando empecen a cambiar de cor, engadimos as cascas dos lagostinos e rustrimos 4-5 minutos para que solten todo o sabor. Botamos sal e pementa ao gusto. 

Pasado ese tempo, cubrimos con auga e deixamos que coza 25-30 minutos. Primeiro a lume alto para que colla temperatura e, despois, baixamos a lume medio-baixo. 

De seguir, trituramos moi ben o noso caldo. 

E coámolo moi ben por se quedou algo sen bater. Aquí teríamos que probar para saber se está o suficientemente saboroso ou se necesita máis sal e pementa. 

E xa teríamos o noso caldo, ou fumet, listo para usar ou comer.

Agardamos que vos guste e que poñades esta receita en práctica. Como vedes, é un caldo moi versátil que podemos usar para unha infinidade de receitas e pratos. Ademais, podémolo gardar en botes, ou en recipientes herméticos, e conxelalo para usalo cando o necesitemos e así aforrarmos unha elaboración cando o volvamos necesitar. 

Así que esperamos que poñades esta receita en práctica e que estes días sigades desfrutando das festas facendo as cousas que máis vos presten. Nós volvémonos ver este xoves cunha nova receita! Aperta forte, bolboreteirxs!