Muffins de arandos e chocolate branco

Bo día, bolboreteirxs, como vai todo? Nós estamos un pouco máis desaparecidos porque estamos compartindo receitas na nosa conta de Instagram. 

Hoxe tráemosvos uns deliciosos MUFFINS DE ARANDO E CHOCOLATE. En moitas ocasións pensamos que as madalenas e os muffins son exactamente iguais e non é así. Os muffins adoitan ter unha cantidade maior de manteiga e algo menos de lévedo, polo que son masas máis pesadas e suben menos no forno, por iso podemos botar máis cantidade de masa nas cápsulas. Ademais, as cápsulas que se utilizan para o seu enfornamos tamén son diferentes. As dos muffins son máis altas, aínda que desta volta usamos as das madalenas porque eran as que tiñamos 😇. 

De todas formas, estes muffins son deliciosos, para facérmolos unha e outra vez.

Muffins de arandos e chocolate branco

Ingredientes:

• 300 g de fariña
• 225 g de manteiga derretida 
• 225 g de azucre 
• 200 ml de leite
• 2 sobres de lévedo El tigre
• 3 ovos
• 2 culleradas de vainilla
• Un chisco de sal
• Arandos
• Chocolate branco

Elaboración:

Para comezarmos, mesturamos os ingredientes secos: a fariña, o azucre, o lévedo e o sal. Reservamos.

Noutra cunca, os húmidos: os ovos, o leite, a vainilla e a manteiga.

Botamos, pouco a pouco, os ingredientes húmidos sobre os ingredientes secos. Removemos moi ben até que estean totalmente integrados.

Engadimos o chocolate branco, troceado, e os arandos.

Repartimos a mesturas nos moldes para madalenas. Reenchemos até case o bordo. Enfornamos a 180°, calor arriba e abaixo, durante 22 minutos.

Deixamos arrefríar.

E xa estarían listos para comer!

Teñen boa pinta, on si? A verdade é que quedan absolutamente deliciosas, e son adictivos, quedades avisadxs 😉🧁🥰❣️

Lémonos pronto, bolboreteirxs❣️