Pizza terrorífica e outra idea

Bo día, bolboreteir@s! Como estades? Supoñemos que na casiña ou non moi lonxe posto que este ano a fin de semana de Samaín é máis terrorífica ca nunca por motivos obvios.

Sexa como for, cremos que aínda chegamos a tempo para vos dar unha idea gastronómica sinxela e rápida para esta noite caseira de celebración dos defuntos e das ánimas. Unha opción ideal para xogardes e saboreardes cos máis peques da casa, que seguro pasan un momento ben divertido na cociña xunto a vós. 

Veña, a por ela! 

Pizza terrorífica e outra idea

Ingredientes:

• Masa de pizza
• Salsa de tomate
• Mozzarella (e dúas lascas de queixo)
• Mortadela siciliana
• Champiñóns
• Cebola
• Olivas
• Ourego
• Allo en po

Utensilios: unha bandexa de forno, papel vexetal e un cortador. 

Elaboración:

Para comezarmos, temos de facer a masa de pizza. Nós fixémola de espelta integral. De seguir, estirámola e dámoslle forma redondeada. Temos que facer dúas, unha de base e outra para facer as vendas. 

Estendemos unha capa de salsa de tomate e empoamos con ourego e un pouco de allo en po.

Botamos o queixo relado, a cebola, ben picadiña, e os champiñóns en láminas. 

Tamén poñemos a mortadela. 

Cortamos a outra masa en tiras e ímoslla poñendo como se fosen vendas. Deixamos un anaco sen vendas para facer os ollos, con dous anacos de queixo e unha oliva cortada ao medio. 

Enfornamos a 250º, calor arriba e abaixo, e cociñámola durante 15-20 minutos, aproximadamente. 

Coa masa que nos sobrou, fixemos unhas momias con salchichas. Para facerlles a cara, axudámonos dun pau e un pouco de salsa de tomate ou Ketchup. 

E xa estaría listos para comer! Que aproveite e que a Santa Compaña non pare preto de onde estades esta noite. Por se acaso, deixade a luz encendida de noite e todo papado, que non veña ninguén procurar comida sobrante. Aperta, amig@s!