Bo día, bolboreteir@s! Vaia fin de semana, deberiamos estar no pleno balbordo das festas de verán e aquí andamos, argallando a troula á nosa maneira, na casiña e con tranquilidade. E celebrando calquera día sen máis xustificación que as ganas de papar unha boa torta na mellor compaña. E iso é o máis importante. Dirián @s máis vell@s: o caso é que haxa saúde. E ganas de comer. 

E nós cremos que esta torta só con vela xa dá ganas de botarte á cociña e argallar a autohomenaxe, lambendo os sobrantes de cada preparación. 

Aquí gustou moitísimo, como era de esperar, e pouco sobrou, porque os lambóns abundan. E vós sabemos que tamén sodes moi moi larpeir@s!

Torta de crema de chocolate e amorodos (e galletas Oreo)

Ingredientes:

Para a base:

• 450 g de galletas Oreo
• 150 g de manteiga

Para o recheo:

• 600 ml de nata
• 300 g de chocolate negro/con leite
• 300 g de amorodos
• 60 ml de auga
• 1 sobre de xelatina en po

Para a decoración:

• Amorodos
• Galletas Oreo
• Nata montada

Utensilios: un molde, un cazo, varias cuncas, un batedor eléctrico, unha manga, un bico, un coitelo e unha espátula.

Elaboración:

Para comezarmos, temos que facer a base da torta. Para iso, trituramos as galletas Oreo e mesturámolas coa manteiga derretida até ter un masa compacta. 

Colocámola no fondo e nos laterais do molde. Refrixeramos.

Botamos a xelatina sobre a auga e deixamos repousar.

Mesturamos o chocolate xunto con 160 ml de nata e derretemos no microondas. Reservamos.

Batemos a nata até que estea semimontada. Reservamos. 

A xelatina xa tivo que absorber a auga, quentamos no microondas até que se volva líquida, uns 15 segundos e mesturámola moi ben co chocolate. 

Imos botando o chocolate sobre a nata e remexemos con movementos envolventes até que se integren.

Botamos unha pouca de crema de chocolate no molde.

Cubrimos con amorodos, cortados á metade. 

E agregamos o resto da crema. Refrixeramos 3-4 horas, mellor unha noite. 

E decoramos. Coa axuda da manga e dun bico facemos formas coa nata e colocamos uns amorodos, tamén algunha galleta.

E xa estaría lista para comer! Ollade que pinta que ten a última de Bolboretas no bandullo. Que gozada preparala e que gozada degustala. É a vosa quenda, amig@s! Aperta!