Lagostinos en bechamel

Bo día, bolboreteir@s! Neste mes de Nadal imos recuperar as dúas receitas por semana xa que andamos con moitas ansias de cociñar e con moitas ganas de vos abrir o apetito con pratos ben apetecíbeis. 

E hoxe ímolo lograr segurísimo pois poucas persoas se poden resistir aos lagostinos e cando coñezades esta opción aínda será peor, hahaha.

Ante outro encontro con amizades, decidimos sorprender argallando novas creacións e optamos por un petisco potente, que adiantase un menú do máis saboroso. Aínda que nós xa adoramos os lagostinos á grella ou ao forno, pensamos en darlles un pequeno baño ;-) A ver que vos parece!

Lagostinos en bechamel

Ingredientes:

• 10 lagostinos
• 1 cabaciña
• Salsa bechamel
• Pementa moída
• Curry

Utensilios: un pelador (ou mandolina), unha prancha e un recipiente apto para o forno.

Elaboración: 

Para comezarmos, debemos facer a salsa bechamel. Aquí tedes a receita. Reservamos. Mentres tanto, facemos tiras co pelador (ou mandolina) da cabaciña e cociñámolas nunha prancha, sazonándoa con pementa moída e curry. Reservamos. 

Pelamos os lagostinos. Podemos gardar a casca do lagostino para facer unha salsa americana ou un caldo de peixe ou de marisco. 

Enrolamos unha tira de cabaciña a cada lagostino. 

E poñémolos sobre a salsa bechamel. 

Gratinamos no forno, a 230º, aproximadamente, até que se gratine a bechamel. 

E xa estarían listos para comer! 

Aínda que na foto xa se pode intuír o bos que estaban a través da foto, pedimos aos creadores de contidos tecnolóxicos que logren permitir o envío de arrecendos ou probas culinarias vía dixital. Entre tanto, a opción que vos queda para confirmar a boa apariencia xa sabedes cal é! Aperta forte, amig@s!