Risotto de espinacas

Mamaíña! Temos a sensación de que desfrutamos dun dos mellores pratos do ano. Si, si, así comezamos hoxe, coa mellor das sensacións, a de elaborar un prato que queda tal e como desexabas. Ou mellor! Porque as probas de sabor entanto estabamos preparando a receita xa intuían que algo espectacular se estaba cociñando. E así foi. 

Un risotto, aínda que non é resulta complexo, si precisa coidado na elaboración e seguir certos pasos para que non nos fique finalmente un arroz sen máis no lugar deste arroz cremoso que procuramos e cunha textura tan especial.

A orixe evidénciase no significante, na denominación deste prato tradicional da gastronomía italiana, moi habitual en todo o territorio mais especialmente no NO. O arroz hai mil e unha forma de o traballar mais este acapara xa toda a nosa atención e recordo gastronómico. Que marabilla!

Risotto de espinacas

Ingredientes (para 2 persoas):

• 150-200 g de arroz redondo
• Caldo de verduras, aprox. 750 ml
• 200 g de espinacas
• 6-7 lagostinos
• 50 g de queixo
• 1 cebola
• 2 dentes de allo
• 1 culleriña de manteiga
• Pementa moída
• 1 chile
• Sal
• Aceite de oliva virxe

Utensilios: unha tixola e unha culler.

Elaboración:

Para comezarmos, rustrimos en dúas culleradas de aceite a cebola e o allo picados finamente. Tamén engadimos o chile. 

Cando estean rustridos, engadimos o arroz e fritímolo un pouco. O arroz máis adecuado para este receita é un arroz redondo. 

Engadimos caldo até cubrir o arroz, aproximadamente será un vaso. 

Deixamos que se vaia cociñando lentamente e, cando se consuma todo o líquido, botamos máis caldo, de novo, até cubrir o arroz. Repetimos ese proceso até que o arroz estea listo, teremos que ir probando. Nós tivémolo que engadir máis líquido 4 veces, mais iso dependerá do arroz que escollades.

Cando o arroz estea case listo, engadimos as espinacas e mesturamos moi ben.

De seguir, os lagostinos. 

A manteiga. 

E o queixo e mesturamos moi ben. O queixo máis típico do risotto é o parmesano, mais nós quixemos darlle o toque persoal e utilizamos San Simón e o resultado foi perfecto!

Servimos inmediatamente e xa estaría listo para comer! 

Agardamos que vos guste e que o probedes a facer na casa, porque non vos ides arrepentir!

Parece apetitoso mais non hai imaxe que poida representar o que has percibir a cada bocado que leves á boca. Está mal que nós o digamos mais quedou impresionante. E estamos seguros que, de seguirdes estes pasos, vós tamén lograredes unha das grandes delicias da gastronomía italiana. Iso si, non puidemos evitar o toque galego, claro. Ai, este queixiño noso... haha.

Pasade unha moi boa fin de semana. Unha fortísima aperta!