Quesadillas de pavo e champiñóns

Que contentos estamos agora que apareceu o sol polo norte e despois de descubrir un prato que temos segurísimo que se fará moi recorrente na nosa casa. Tiñamos ouvido falar das quesadillas e cremos que tamén probado nalgunha vez mais non debeu ser un grande éxito posto que non o lembramos.

Mais procurando nas orixes e variantes desta receita comprobamos que tiña toda a pinta de nos saber moi ben. Ademais, ofrécenos a posibilidade de utilizar produtos dos que tod@s temos na casa e xa sabedes que iso para nós é moi importante. Coñecemos a xente e na cociña diaria valórase moitísimo a accesibilidade.

Ben, pois a palabra quesadilla móstrase claramente española, con esa terminación "delatora" que neste caso non conleva o valor diminutivo. Con todo, é un alimento asociado especialmente ás terras mexicanas, onde o degustan con frecuencia con mil e unha variantes sendo sempre imprescindíbel o queixo, claro.

Con este prato demóstrase tamén que non toda a gastronomía mexicana se define polo picante aínda que nada impide utilizarmos algún mollo que nos traia os colores á cara. Ollade, ollade!

Quesadillas de pavo e champiñóns

Ingredientes (para cada quesadilla):

• 2 tortillas de trigo/millo
• 3 lascas de pavo
• 1 champiñón
• Queixo relado ao gusto

Utensilios: unha tixola, unha espátula e un coitelo.

Elaboración:

Para comezarmos, temos de pór unha das tortillas sobre a tixola, a medio lume. 

Sobre ela, colocamos as lascas de pavo.

O champiñón cortado en láminas.

E abundante queixo relado. Nós utilizamos mozzarella, mais podedes usar o que máis vos guste.

Cubrimos coa outra tortilla. 

Cando vexamos que a tortilla de abaixo xa está crocante e o queixo comeza a fundirse, debemos darlle a volta, coa axuda da espátula, e deixar que se cociñe polo outro lado. Cando estea lista polos dous lados, retiramos do lume.

 Cortámola en varios anacos e xa estaría lista para comer! Agardamos que vos guste. 

A apariencia é boa mais o sabor é espectacular! O triunfo do queixo unha vez máis trae o éxito á nosa cociña. Entre tortillas e queixo nós optamos por produtos clásicos que tiñamos na casa mais podedes probar con outras opcións porque veredes que isto está moi moi bo. A nós recordounos bastante, a verdade, aos sandwich, mais cremos que gana bastante coa mudanza do pan. Ou talvez sexa que o pan de molde o temos algo máis aborrecido. Queremos que nós contedes vós porque nós quedamos tan contentos coas quesadillas... 

Boa fin de semana, amig@s. Desfrutade inmensamente!!!