Falsas madalenas

Por fin chegou o entroido, canto nos tardaba, e iso que, como vistes nas redes, xa levamos semanas aproveitándonos das larpeiradas da época. Non nos cansamos de dicilo. Para nós, gastronomicamente, esta é a mellor etapa do ano con diferenza. Non aborrecemos nadiña do que comemos, e aínda por riba adoitamos quedar con ganas de máis para o ano seguinte.
Con todo, hoxe non vos traemos unha das receitas tradicionais entroideiras senón que optamos por disfrazar un prato, tal e como facemos as persoas nestas xornadas. Son coñecidos os famosos "trampantollos" ou "trucos" en alta cociña, principalmente, e que consisten en levar unha apariencia enganosa. Aínda que estas falsas madalenas parten dunha maior sinxeleza da que adoita caracterizar ese tipo de pratos, vén enganando a vista, sendo despois o bandullo quen rapidamente revela a verdade. Así pois, esta "pseudosobremesa" doce, acabe por ser todo o contrario. @s comensais ficaron sorprendid@s. Que vos parece a vós? 

Falsas madalenas

Ingredientes ( para 6 unidades):

Para as madalenas: 

• 400-450 gr de carne picada
• 1 clara de ovo
• 1 cebola
• 1 cenoria
• 1 dente de allo
• 6 dados de queixo
• 1 culleriña de cúrcuma
• 1/2 culleriña de ourego
• Pementa moída
• Un chisco de sal

Para a decoración ( puré de pataca)

• 2-3 patacas
• 1 xema de ovo
• 1 cullerada de manteiga
• 1-2 culleradas de leite
• Noz moscada
• Pementa moída
• Un chisco de sal

Utensilios: moldes para madalenas, unha tixola, unha pota, un garfo, unha manga pasteleira cun bico estrelado e unha cunca.

Elaboración: 

Para comezarmos temos de facer as madalenas. Como veredes, é unha receita moi similar á das albóndegas. Picamos o allo, a cebola e a cenoria finamente e rustrímolos en dúas culleradas de aceite.

Cando estean listos, mesturámolos coa carne picada e a clara do ovo e sazonamos coa cúrcuma, o ourego, a pementa moída e o sal.

Facemos pequenas boliñas coa masa, aplanámolas na man e poñemos un dado de queixo no centro e pechamos a bola para que non saia o queixo.

Colocamos as boliñas no molde para madalenas e enfornamos a 180, calor arriba e abaixo, durante 20 minutos, aproximadamente.

Mentres tanto, temos de preparar o puré. Pelamos, lavamos e cortamos as patacas en anacos. Cocemolas en abundante auga cun chisco de sal.

Despois, escoámolas e esmagámolas coa axuda dun garfo (ou dun pasapuré), engadimos a xema e a manteiga e mesturamos moi ben até conseguir unha crema. Posteriormente, engadimos a pementa moída e a noz moscada. Se vemos que nos queda algo dura, engadimos o leite e mesturamos moi ben.










Metemos o puré na manga e decoramos as boliñas de carne.

Enfornamos de novo, mais esta vez co gratinador a 200 até que se doure un pouco o puré.

Servimos e xa estarían preparadas para comer! Agardamos que vos gusten e sorprendades aos vos@s convidad@s.

Como vedes, a madalena garda moita sorpresa ao abrir. Atopámonos carne no canto dunhaa masa de biscoito. Queixo por dentro no canto de, por exemplo, chocolate, e unha cobertura de puré que simula á perfección unha crema pasteleira! Vaia coa madalena! Mais tamén teñen dereito a se disfrazar, claro está.

E, ademais, podemos dicir que é un prato redondo no relativo ao sabor xa que carne, queixo e puré dan perfectamente.
@s nos@s convidad@s xa puxeron cara de desconcerto cando presentabamos a sobremesa de primeiro. Mais despois todo o entenderon... Animádesvos a disfrazar a vosa receita? Xa nos contaredes ou mostraredes. Unha aperta e... bo entroido!!!