Pizza vexetal con masa de centeo

Sábado de receita e sempre que traemos unha pizza vimos con maior alegría porque talvez sexa o produto que máis desfrutamos para comer frecuentemente. A de hoxe non é a primeira pizza que vos traemos, mais si é ben diferente debido aos ingredientes, a salsa de tomate, á masa, ao enfornado... Con estas mudanzas logramos unha pizza que para nós é practicamente perfecta e que temos seguro que a tod@s vós vos encantará.

Ben sabedes da nosa adoración pola gastronomía italiana, así que nós xa temos un día á semana de pizza. De tanto facela, case nos consideramos mesmo expertos, haha. Así que non pensedes que esta é unha simple receita de pizza, ten moito de interese e moito do que lle tirarmos proveito para que nos quede unha pizza da casa moi ben feitiña, con esa masa grosa e con algunha que outra sorpresa no interior... Aí vos vai!

Pizza vexetal con masa de centeo

Ingredientes:

Para a masa:

• 260 gr de fariña de centeo
• 240 gr de fariña de forza
• 300-350 ml de auga
• 10 gr de lévedo de panadaría
• Unha cullerada de aceite
• Unha culleriña de coandro
• Un chisco de sal

Para o recheo:

• Salsa de tomate
• Queixo relado
• 1 bola de queixo mozzarella
• 1 tomate
• 5-6 espárragos verdes
• 1/2 pemento vermello

Utensilios: batedor eléctrico ou manual e papel vexetal.

Elaboración: 

Para comezarmos, temos de preparar a masa. Para iso, mesturamos as dúas fariñas. 

Engadimos o sal, o coandro e o aceite. Mesturamos ben.

De seguir, imos engadindo, pouco a pouco, o lévedo diluído na auga. Mesturamos ben até conseguir unha masa homoxénea e elástica.

Botamos un chisco de auga sobre a masa para a humedecer, tapámola cun pano e deixamos repousar até que duplique o seu tamaño, aproximadamente 2 horas. 

Colocamos a masa sobre papel vexetal con fariña e ímola estirando pouco a pouco até que teñades o grosor que máis vos guste, nós facémolo coas mans e deixámola algo gordiña mais podedes utilizar un rolete. 

Despois, botamos sobre os bordos o queixo relado e ímolos dobrando sobre si mesmos para tapar o queixo coa axuda das mans.

A continuación, botamos unha capa de salsa de tomate (nós fixémola triturando un par de tomates, un dente de allo e un chisco de ourego para que tivera máis sabor). De todas formas, se tedes algo de présa, podedes botar da de bote.

Cortamos o tomate en lascas e colocámolas sobre a salsa de tomate. 

De seguir, uns anacos da mozzarella (metade da bola, aproximadamente), os espárragos en cachiños e uns dadiños de pemento.

A continuación, engadimos o resto da mozzarella. 

Enfornamos á máxima potencia do forno, calor arriba e abaixo, colocándoa abaixo de todo, durante 10-12 minutos e xa estaría lista para comer!

Non leva carne, nin falta que fai, porque parece que esta pizza ten de todo, ou non? Unha masiña grosa e crocante, uns bordos recheos de queixo que lle dan aínda máis sabor, unha salsa caseira cun toque a allo... A clave para nós está no enfornado. Até o de agora sempre a poñíamos no medio do forno porque tiñamos medo a que se nos queimase, mais desde que probamos a poñela na parte máis baixa, notamos un cambio ben notábel. A pizza cócese en menos tempo e a masa sube moitísimo máis xa que se segue o método tradicional dos fornos de pedra, onde a masa está colocada directamente sobre o foco de calor.

Queremos ver os vosos resultados despois de seguirdes algún destes trucos, mais podedes estar tranquil@s porque tedes o éxito garantido. E iso si, os ingredientes xa os poñedes a gusto de cada quen. Nós desta volta optamos por verduras, acordándonos tamén d@s nos lectores/as vexetarian@s.

Unha forte aperta. Agardamos que pasedes un moi feliz sábado!