Torta de dous chocolates con améndoa

Esta semana tiven un par de encargos para dous aniversarios así que entón aproveitei para pór en práctica algunha torta que tiña en mente e que tiña ganas de facer xa hai un tempo. Hoxe preséntovos unha delas, unha verdadeira oda ao chocolate e ao doce en xeral, a torta de dous chocolates con abelás. Como xa veriades noutras receitas, tiro moito proveito da mestura destes elementos, aínda que a verdade poucas veces ficou un resultado tan óptimo como nesta sobremesa. Segundo as miñas informacións non durou máis de 10 minutos na mesa, todo un éxito :-)

Torta de dous chocolates con abelás

Ingredientes:

• 4 ovos
• 175 gr de manteiga
• 125 gr de azucre
• 150 gr de chocolate negro
• 100 gr de chocolate con leite
• 140 gr de améndoa 

Para a decoración:

• 80 gr de améndoa en po 
• 20 gr de manteiga
• 2 culleradas de azucre 
• 3 culleradas de azucre glas
• 1 amorodo grande

Elaboración:

Para comezarmos, temos de preparar o molde que imos utilizar. Para iso, untámolo de manteiga e sobre a manteiga botamos as dúas culleradas de azucre e a améndoa en po. Reservamos

                                                   

A continuación, fundimos os dous chocolates, pode ser no microondas ou ao baño maría. De seguir, engadimos a manteiga e mesturamos até que quede unha mestura homoxénea e brillante. Reservamos. 

Batemos os ovos co azucre até que a mestura triplique o seu tamaño. Despois, engadimos o chocolate sen deixa de bater. 

m

Así mesmo, botamos a améndoa, nós utilizamos unha mestura de améndoa moída e laminada, reservando unha cullerada, e mesturamos ben. 

Vertemos a mestura no molde e botamos a améndoa que reservaramos por encima da mestura.  

Enfornamos a 180º, calor abaixo e ventilador, durante 40 minutos. Deixamos que arrefrie un pouco e desmoldamos. Para finalizar decoramos empoando a torta con azucre glas e colocando un amorodo en láminas no centro da torta e xa estaría lista para comer! Non vos despistedes, que esta torta voará en 5 min!! 

Xa vedes, irresistíbel. A pesar da súa apariencia, é bastante lixeira polo que poderedes repetir, sempre que @s demais comensais volo permitan, haha. Posúe un sabor do máis intenso que a converte nunha tentación para @s máis larpeir@s. Se estades pensando en achegarvos ao mundo das tortas esta é unha fantástica idea porque te aseguras un resultado excelente. Desfrutade e atrevédevos con ela ;-)