mércores, 19 de marzo de 2014

Rosca de xamón e tomate

Como ides comprobar a receita de hoxe é moi moi sinxela, algo máis que un simple bocadillo. Primeiro porque que serve para comermos varias persoas xa que utilizamos unha rosca de pan, e despois porque creamos un mollo para el que o fai do máis apetecíbel. Estamos así ante unha receita que parte dunha das mellores mesturas gastronómicas existentes, canto menos para min, a de tomate, aceite e xamón.
Aquí vos deixamos este prato para saírdes de calquera apuro e que vos encantará: 

Rosca de xamón e tomate

Ingredientes (para 2 persoas):
  •  1/2 rosca de pan
  • 200 gr de xamón
  • 1 tomate
  • 1 dente de allo
  • Queixo relado
  • Aceite de oliva
  • Alfábega

Elaboración:

Para comezarmos temos que facer a salsa de tomate. Para iso, batemos o tomate, cortado en anacos, co allo e unha cullerada de aceite de oliva.







De seguir, abrimos a rosca pola metade e untamos coa salsa de tomate. 




Colocamos, por riba, o xamón, a alfábega ao gusto, un chorro de aceite de oliva e o queixo. 




Tapamos coa outra metade do pan e forneamos a 180º, calor arriba e abaixo, durante 10 minutos aproximadamente para que se torre o pan e se derreta o queixo. E xa estaría preparada para comer!!

                                   
Como vedes moi moi sinxelo, e aínda que non pareza un prato espectacular, comprobaredes que o sabor é moi intenso. A clave está nese mollo con que untamos o pan e que ao se mesturar co xamón se converte nun verdadeiro manxar. Probade a facela e xa veredes como namorades desta rosca!

Ningún comentario:

Publicar un comentario