Madalenas samaínicas de cabaza e chocolate

 Bo día, bolboreteirxs! Desta volta, de domingo! Esta semana foi eterna coa listaxe infinita de tarefas que tivemos que facer! Porén, aproveitando que o venres tiñamos convidadxs a cear, aproveitamos para facermos estas deliciosas, e terroríficas, madalenas. A cabaza está de tempada é un dos símbolos do outono e, mais en concreto, do Samaín e a nós encántanos, así que probar a combinación de cabaza e chocolate foi todo un acerto. 

Oxalá vos guste: 

Madalenas samaínicas de cabaza e chocolate

Ingredientes:

Para a masa de cabaza:

• 130 g de cabaza asada
• 130 g de azucre
• 110 ml de aceite
• 85 g de fariña
• 1 culleriña de lévedo
• 2 ovos

Para a masa de chocolate:

• 150 g de fariña
• 130 g de azucre
• 110 ml de aceite
• 40 g de cacao puro
• 1 culleriña de lévedo
• 1/2 culleriña de bicarbonato
• 2 ovos

Para decorar:

• Chocolate para fundir
• Boliñas de chocolate

Utensilios: dúas cuncas, un molde para madalenas, cápsulas para madalenas, un batedor eléctrico/manual, unha peneira, unha espátula, un escarvadentes, unha cunca e unha culler. 

Elaboración:

Para comezarmos, temos de facer a masa de cabaza. Para iso, mesturamos o aceite xunto co azucre e a cabaza. A cabaza está simplemente cociñada no forno (a 200º durante 30 minutos), sen nada, e despois machacada un garfo. 

Engadimos os dous ovos. 

Tamén a fariña mesturada co lévedo, peneirados, até termos unha masa homoxénea. 

Colocamos as cápsulas nos moldes para as madalenas e enchemos a metade coa masa. Nós usamos unha culler de xeado e botamos unha cullerada. Reservamos. 

De seguir, facemos a masa de chocolate batendo, en primeiro lugar, o aceite co azucre. 

Despois, os ovos. 

E a fariña xunto co cacao, o bicarbonato e o lévedo, ben peneirados, para que non queden gromos co cacao.

E botamos unha cullerada sobre a masa de cabaza. 

Mesturamos un pouco cun escarvadentes as dúas masas e enfornamos, co forno prequente, a 185º, calor arriba e abaixo, durante 25 minutos. 

Deixamos que arrefríen sobre unha grella. 

De forma opcional, nós só o fixemos con algunhas, derretemos un pouco de chocolate e estendémolo para pórlles encima unhas boliñas de chocolate. 

E xa estarían listas para comer! 

Como vedes, esta é unha receita moi sinxela e a combinación de cabaza e chocolate é impresionante, quedan moi saborosas e cunha textura moi esponxosa. 

E, con eses toques de decoración, queda moi samaínica.

Aperta forte!

Lémonos, bolboreteirxs!