Mexillóns con maionesa de allo

Boa noite, bolboreteir@s!! Aproxímase Samaín e nós xa andamos preparando as cabezas co pequeno mais onde xa levamos moito traballo feito é no magosto. Vaia chea de castañas asadas levamos no bandullo e aínda non chegamos a Defuntos. Si, vale, hoxe a receita non ten nada que ver con estas datas mais era para mantervos informados de que estamos cumprindo como vos devotos dos magostos. E iso que non nos cadrou ningún festexo por aquí na zona de Oleiros, que senón... non faltabamos!

O caso é que hoxe imos por mar e non por souto. Optamos por un dos nosos bivalvos favoritos, os mexillóns. O que algúns chaman marisco dos pobres e que cremos que só pode derivar tal afirmación dun prezo máis económico que outros moluscos, ten sempre un oco na nosa cociña. A maioría das veces elaborámolos simplemente ao vapor e despois cun chisco de limón. Porén, desta volta, animados polos veciños para unha xuntanza que tiñamos e seguindo un recetario de Isasaweis, preparamos unha versión máis elaborada e que fai brillar inmensamente o produto principal. Aí vai!

Mexillóns con maionesa de allo

Ingredientes:

• Mexillóns
• 250 ml de viño branco
• 3-4 dentes de allo       
• 2 follas de loureiro
• Maionesa de allo
• 1 ovo
• 1 dente de allo
• Aceite de xirasol
• Vinagre
• Sal

Utensilios: unha pota grande, un batedor eléctrico co seu vaso, unha bandexa de forno e papel vexetal (opcional).

Elaboración:

Para comezarmos, temos de limpar os mexillóns. De seguido, poñémolos na pota grande xuntoco viño, os dentes de allo (sen pelar) e o loureiro. 

Tapamos, poñemos a lume alto e cociñamos 4-5 minutos, até que se abran. De seguir, quitámoslles a parte de arriba.

Facemos a maionesa de allo. Para iso, poñemos no fondo do vaso o ovo, o dente de allo, unha cullerada de vinagre, o sal e cubrimos con aceite até que supere 2 cm o resto dos ingredientes. Poñemos o batedor no fondo e empezamos a bater sen movelo. Cando se converta nunha crema clara, levantamos lentamente e comezamos a mover durante 30 segundos. 

Cubrimos os mexillóns coa maionesa.

Enfornamos a 230°, co gratinador, até que se doure a maionesa. 

E xa estarían listos para comer! 

Xa vedes que non dan moito traballo e están, literalmente, para relamber os dedos. Si, algo ha de quedar neles, haha. Agardamos que vos sexa de proveito esta versión. Unha aperta!!