sábado, 15 de abril de 2017

Petit-suisse caseiros

Amigos bolboreteir@s, por aquí non entendemos de festivos nin de procesións (excepto nas que desfilan os menús de buffet libre, haha). Seguimos pois coas nosas receitas e continuamos tamén co noso percorrido como youtubeir@s cunha achega especial, chea de recordos e sabor natural.
Desde hoxe, non vos poderedes resistir a probar esta receita de Petit-suisse caseiro (clicade aquí para ver o vídeo) . Que si, que si, que é posíbel e moi moi sinxelo. E moit@s desconfiarán do resultado parecido xa que este tipo de produtos de mercado sempre teñen unha mimese complexa. Pois explicámosvos. A textura é idéntica e ides notar que o sabor é moi parecido mais percíbese perfectamente que hai un sabor de amorodos moito máis intenso e natural, o que, ao noso modo de ver, dá un salto de calidade a esta lambetada.
Se xa nos dicían que tiñamos que para medrar había que comer petit-suisse, como papemos estes deixa a ver se non chegamos á lúa. Imos entón con esta delicia nostálxica. A por eles!


Petit-suisse caseiros



Ingredientes:


  • 500 g de amorodos
  • 250 g de queixo crema
  • 150 g de azucre
  • 100 ml de nata
  • 2 culleradas de callada
  • Para decorar: boliñas de cores


Utensilios: un cazo grande, unha cunca, un batedor eléctrico e o seu vaso, unha culler de pau e un batedor manual.


Elaboración:


Para comezarmos, temos de cortar os amorodos e trituralos co batedor eléctrico.









De seguir, reservamos un pouco dos amorodos triturados (2-3 culleradas) e mesturámolos coa callada.  Reservamos.


Quentamos o resto dos amorodos e quentamos até que ferva. Logo, Engadimos os amorodos mesturados coa callada e mesturamos moi ben.


Pasados 2 minutos, agregamos o azucre, a nata e o queixo crema e remexemos até que se integren completamente.



Servimos nos vasos e refrixeramos, polo menos, 4-5 horas.


Despois, decoramos ao noso gusto. Nós utilizamos unha pouca de nata e boliñas de cores.


E xa estarían preparados para comer!! Agardamos que vos gusten!! 


Xa vedes que a cor e textura fica idéntica. Claro, para coñecerdes o sabor... só vos queda achegarvos á horta ou ao super, mercar uns poucos de amorodos e a triturar! De seguro que ides desfrutar coa preparación e sobre todo coa proba. Iso si, nós tivemos que resistir moito para que non desaparecesen nun abrir e pechar de ollo, vaia vicio! E iso, que os cargamos cunha cantidade que case deixaban de ser petit, haha. Agardamos os vosos comentarios e impresións no blogue, canle de Youtube e diferentes redes sociais. Moitas grazas por estardes sempre aí. Unha aperta!

2 comentarios:

  1. Uummmmmmmmmmmm que ricooooooooos nada que ver con los que se compran yo tambien los hago y son vistos y no vistos hay que aprovechar que estamos en temporada de fresas .
    Os han quedado de relujo y seguro sabian mejor.
    Bicos mil wap@s.

    ResponderEliminar
    Respostas
    1. Sii, efectivamente! A próxima temos que probar con amorodos e plátano que seguro que tamén están de vicio 😍😍

      Eliminar