Hamburguesas de feixóns e champiñóns

Xa sabedes do noso interese polo veganismo, que vai a máis e que nos leva a investigarmos e probarmos solucións dentro desta alimentación alternativa. No pasado LGx15, falamos precisamente da necesidade de incorporarmos o noso idioma ao corpus de receitas veganas, cada vez máis recorrente e onde non podemos ficar á marxe. Ademais, cant@s galegofalantes vegan@s non haberá? E ben merecen poder ler as indicacións para facer diversos pratos na súa lingua. Así pois, nós tentamos colaborar con novas achegas. Certo é que non son as suficientes mais procuramos dedicar con certa frecuencia, atención a este apartado.

E o de hoxe ademais xurdiu como receita de aproveitamento pois sobraron uns feixóns do chili con carne que preparamos hai tempo e pensamos en tirarlles beneficio. E a verdade é que as hamburguesas sempre se prestan a todo tipo de inventos. E a verdade é que este deu na chave pois alén do gran parecido á hamburguesa de carne, logrou un sabor superpeculiar. 

En conclusión, unha argallada de Bolboretas no bandullo que se tornou nunha revelación e que nos apetece moitísimo repetir. Apetece?

Hamburguesas de feixóns e champiñóns

Ingredientes:

• 200 g de feixóns cocidos
• 6-7 champiñóns
• 1/2 cebola
• 1 dente de allo
• 1/4 de culleriña de comiño
• 1/4 de culleriña de eneldo
• Pementa moída
• 3-4 culleradas de fariña
• Aceite de oliva
• Para acompañar: pan, leituga, tomate, cebola e cogombros curtos.

Utensilios: unha tixola, o batedor eléctrico e o vaso do batedor, unha cunca. 

Elaboración:

Para comezarmos, rustrimos a cebola e o allo en dúas culleradas de aceite, non é necesario picar moito as verduras xa que despois ímolas triturar. 

Cando abrande, engadimos o champiñóns cortados en anacos.

Tamén a pementa, o comiño e o eneldo. 

Cando estean ben cociñados, botámolos no vaso do batedor. 

Agregamos as fabas cocidas e trituramos ben. 

Engadimos dúas culleradas de fariña e comezamos a mesturar. Temos que conseguir unha masa algo dura e consitente, que non se pegue. Dependendo da auga que tiveran as verduras e as fabas, precisaremos máis ou menos fariña. 

Dámoslles forma ás hamburguesas. 

Fritímolas en dúas culleradas de aceite, até que se fagan ben polos dous lados. 

Montamos a nosa hamburguesa cos nosos ingredientes preferidos. Nós usamos leituga, tomate, cebola e cogombros curtos. 

E xa estarían preparadas para comer! Agardamos que gustedes delas! 

Ademais, xa sabedes todo o bo que nos ofrece o formato hamburguesa para a alimentación infantil pois permítenos integrar todo tipo de produtos que talvez doutra forma non probasen os peques. Despois de probar esta, pediran e pediredes hamburguesa de feixóns todas as semanas. Que delicia, por favor!

Viva o veganismo e viva a creatividade! Adiante, bolboreteir@s!