Croquetas de brócoli e cenoria

Seguimos de verán aínda que o ceo, canto menos na Mariña Luguesa, nos queira dicir o contrario. E nós seguimos coas nosas receitas para que teñades o día un pouco máis entretido. E hoxe imos cunha outra versión dun clásico, mais un recurso dos máis aproveitábeis na cociña, as croquetas. Desta volta optamos por facelas a partir de verduras, deixando a carne a un lado, e como sempre, ficaron ben saborosas.
Nós sempre dicimos que as croquetas son unha das mellores opcións para @s peques, xa que grazas a elas poden degustar alimentos que talvez doutro xeito xamais comerían. Sobre todo para aqueles que adoitan comer moi pouca verdura.
E ademais, que as croquetas sempre se realizan con pouco traballo e moita sinxeleza e mesmo eles e elas nos poden axudar. E de seguro que así aínda lles saben mellor. Que cando un/unha se sinte partícipe do traballo, xa se sabe... haha

Croquetas de brócoli e cenoria

Ingredientes:

• 1/2 brócoli
• 1 cenoria
• 1/2 cebola
• 1 dente de allo
• 80 gr de fariña
• 700 ml de leite
• Aceite
• Estragón
• Pementa moída
• Sal
• Para empanar: fariña, 2 ovos batidos e pan relado. 

Utensilios: tixola, coitelo, táboa, relador, batedor manual (ou culler de pau), fonte e papel transparente e absorbente.

Elaboración: 

Para comezarmos, temos que relar o brócoli e a cenoria. Reservamos.

 A continuación, picamos finamente a cebola e o dente de allo e rustrímolos nunha tixola con dúas culleradas de aceite. 

De seguir, engadimos a cenoria e o brócoli. Botamos un chisco de sal, de estragón e de pementa, mesturamos ben e cociñamos durante, aproximadamente, 10 minutos. 

Despois engadimos a fariña e mesturamos moi ben para que perda o seu sabor. 

E engadimos o leite pouco a pouco para que se vaia integrando coas verduras. 

Deixamos cociñar uns minutos sen parar de remexer até que a mestura espese e se comece a despegar da tixola. 

Botamos a mestura nunha fonte, tapamos con papel transparente e refrixeramos 3-4 horas.

Pasado ese tempo, faremos, coa axuda das mans, pequenas boliñas que pasaremos por fariña, ovo batido e pan relado. 

Agora temos dúas opcións, conxelar as croquetas e telas preparadas para calquera outro día, ou fritilas en abundante aceite para comelas no día. Despois de as fritir, témolas que pór nun prato/fonte con papel absobente para eliminar o exceso de aceite.

E xa estarían preparadas para comer! Que aproveite! 

Alén do beneficio de estaren integradas principalmente por verdura, son, evidentemente, moito máis saudábeis que as que mercamos conxeladas. E tanto dá comelas quentiñas, acabadas de facer, que tempo despois, cando estean frías. Un recurso para unha cea con convidad@s ou para un día calquera que vos apeteza. As croquetas sempre nos sacan dalgún apuro, e se saen tan boas coma estas aínda mellor.

Unha forte aperta. Desfrutade deste martes chuvioso con esta nova receita :-)