Torta de trufa

Aínda coa emoción da entrada do pasado xoves en que contamos con Miro Villar, xa regresamos cunha outra receita, dirixida como non, aos máis lambóns e lambonas e só apta para chocolateir@s.

Esta torta xa a fixeramos hai un par de meses para o aniversario dunha amiga moi especial, mais esquecímonos da maior parte das fotografías, quedando pendente unha nova elaboración para a presentarmos aquí, para tod@s vós. E que xa sabedes, encántanos cociñar e degustar os nosos pratos mais sobre todo pór á vosa disposición todas aquelas receitas que imos traballando para que leades, probedes e nos comentedes.

Pois ben, finalmente nesta última fin de semana encargáronnos unha torta moi moi doce para un aniversario e veunos esta á cabeza inmediatamente. Polo que parece os e as comensais quedaron tan satisfeit@s como cando nós a degustamos así que perfecto! 

Torta de trufa

Ingredientes:

Para o biscoito:

• 300 gr de chocolate con leite
• 225 gr de manteiga
• 180 gr de azucre
• 100 gr de fariña
• 1/ 2 sobre de lévedo en po
• 6 ovos

Para a trufa:

• 750 ml de nata (35% materia graxa)
• 300 gr de chocolate negro
• 9 culleradas de crema de cacao

Para a decoración: fídeos de chocolate, boliñas de cores, figuas de azucre etc. 

Utensilios: molde desmoldábel, batedor eléctrico/manual, cuncas, culleres, manga pasteleira, bico, 

Elaboración:

Primeiramente, temos de facer o biscoito. Para iso, empezamos derretendo o chocolate no microndas ou ao baño maría. 

Mentres tanto, batimos o azucre coa manteiga, que ten que estar a temperatura ambiente, até obter unha crema homoxénea e brandiña. Podémolo facer co batedor manual ou co eléctrico. 

Engadimos o chocolate e mesturamos ben. 

Separamos as claras das xemas, reservamos as claras, e botamos as xemas. Mesturamos de novo.

Agregamos a fariña e o lévedo peneirandos e mesturamos. 

Aparte, montamos as claras a punto de neve. 

Engadimos as claras, pouco a pouco, á mestura anterior. 

Botamos a crema no molde, que previamente debe estar engrasado con manteiga e fariña, e enfornamos a 165º-º170º (debe estar prequente), calor abaixo e ventilador, durante 50 minutos. Reservamos até que arrefríe completamente. 

Mentres arrefría o biscoito, facemos a trufa. Derretemos o chocolate, xunto coa crema de cacao, ao baño maría e deixamos que arrefríe. 

Montamos a nata a punto de neve, lembrede que debe estar moi fría. 

Cando arrefríe o chocolate, ímoslle engadindo a nata pouco a pouco até conseguir unha crema homoxénea. 

E chegou a hora de montar a nosa torta!! Para iso, abrimos o biscoito á metade e reenchemos con parte da crema. Tapamos coa outra metade. Como vedes, ao tapalo, o biscoito rompeunos un pouco mais non hai problema porque non se vai ver. 

A outra parte da trufa botámola nunha manga pasteleira e imos decorando a torta ao noso gusto. 

Nós botamos polos lados os fídeos de chocolate e por arriba boliñas e figuras de azucre por arriba. Refrixeramos durante 3-4 horas e xa estaría lista para comer!!

Dicímosvolo moitas veces, mais convén insistir para que non vexades a cociña e a repostaría en concreto como algo dificultoso. Require paciencia e orde mais calquera persoa pode lograr grandísimas sobremesas, canto menos de sabor. Despois si que é verdade que canto máis dotes para o deseño e a decoración, mellor pode ficar a torta. Así que... por que non vos animades con esta torta de trufa. Se non queredes arriscar, probade a facela un día calquera para ver como sae. Mal non vai pasar, porque ha de quedar deliciosa, e máis tarde, xa a poderedes preparar sen preocupación ningunha para sorprenderdes aos vos@s convidad@s.
Agardemos que vos guste e que mandedes algunha foto co voso resultado. Unha forte aperta lambonciñ@s!