Bo día, bolboreteir@s! Nova receita e regresamos co doce a Bolboretas no bandullo. Desta volta unha que tiñamos gardada de unas semanas atrás cando celebramos un aniversario cunha sobremesa contundente coma esta. Aínda que é certo que as madalenas son unha lambetada apta para calquera momento do día. A nós encántannos ao almorzo, á merenda, de sobremesa...
Só é preciso pertencer ao club dos bos lambóns e gozar de ideas chocolateadas coma esta, na que non hai nin unha soa miga que non nos adoce bandullo e corazón. Velaquí a tedes.
Madalenas de crema de cacao con abelás
Ingredientes:
- 380 g de crema de cacao con abelás
- 150 g de fariña
- 3 ovos
- 1 culleriña de lévedo en po
- Un chisco de sal
- Boliñas de chocolate
Utensilios: moldes para madalenas, cápsulas para madalenas, unha cunca grande e un batedor eléctrico.
Elaboración:
Para comezarmos, temos de bater os ovos até que dupliquen o seu tamaño.
De seguir, agregamos a crema de cacao.
Mesturamos a fariña co lévedo e o sal e engadímolo á mestura anterior.
Repartimos a mestura nos moldes, cubertos coas cápsulas.
Botamos as boliñas de chocolate.
Enfornamos a 180°, calor abaixo, durante 20 minutos.
Deixamos que arrefríen un pouco e xa estarían listas para comer.
Apetecen a esta hora e a calquera. E se se vos fai a boca auga, agardade a recrealas e meter a primeira dentada. Que gustazo! Como prestan. De seguro que as desfrutades inmensamente, amig@s! Xa nos contades. Aperta!
Ningún comentario:
Publicar un comentario