Ensalada de pasta caprese

Bo día, bolboreteir@s! A gastronomía non para en Bolboretas no bandullo. Nós somos como as cobras e saímos coas raiolas do sol. Así, aproveitamos algunha destas xornadas para facer iso que tanto nos gusta, xantar fóra, tirados nalgún prado. E para iso o que apetecen son receitas frescas e lixeiras. Hai que aproveitar agora que parece que volve o sol e aquí sempre temos o temor de que poda ficar por pouco tempo. Aínda que certo é que estamos na primavera e de momento non podemos estar moi exixentes coas temperaturas.
Pois, argallando nun destes novos pratos chegamos a unha variante da clásica ensalada de pasta. Unha opción chea de sabor e que parte da famosa ensalada caprese que xa preparamos hai tempo para o blogue e que tamén aparece polos nosos menús con frecuencia.
Imos con esta delicia!

Ensalada de pasta caprese

Ingredientes:

• 250 g de pasta
• 100 g de salsa de tomate
• 1 bóla de mozzarella
• 14-15 tomatiños cherry
• 9-10 olivas
• 4-5 espárragos
• 4-5 follas de alfábega
• 2 culleradas de aceite
• Pementa moída

Utensilios: unha pota, unha cunca grande, unha táboa e un coitelo.

Elaboración:

Para comezarmos, temos de cocer a pasta seguindo as instrucións do paquete. 

E, mentres tanto, picamos os tomatiños.

E tamén a mozzarella e a alfábega. Mesturamos todo. 

Agregamos, tamén, os espárragos e as olivas, cortados en anacos. 

Botamos as salsa de tomate e mesturamos ben. 

Engadimos a pasta, o aceite e pementa moída ao gusto. 

Refrixeramos para tomala ben fresquiña e xa estaría lista para comer! 

Agardamos que vos guste e que a poñades en práctica!! Mais iso si, preguntámonos se seredes capaces de resistirvos a ela. É toda unha tentación e de seguro que vos namorará desde o primeiro bocado. Desfrutádea. Unha forte aperta!