Bolachas saudábeis de avea e plátano

Bolboreteir@s, xa estamos de novo por aquí para tentar adozarvos o día aínda que hoxe ímolo facer de forma moi saudábel. Si, doce e saudábel son totalmente compatíbeis aínda que moitas veces afastatemos estes termos pola asociación co azucre refinado e os procesados.

Pois como comezamos esta semana con ansias de larpeiradas, pensamos en algo que cumprise cos criterios desexados. Desta volta, inspirámonos nunha receita dunha conta de Instagram (@megasilvita) e aproveitando que contabamos con todos os produtos pola casa non tardamos en executala.

Ademais, estamos ante unha certas receitas que serven para calquera parte do día. Nós comezamos aproveitando para a sobremesa, almorzamos con ela e chegaron até a merenda. Cumpren nos diferentes momentos con éxito. 

Tampouco perderedes tempo pois é cuestión de combinar ingredientes, pór no forno e a agardar. Velaquí están!

Bolachas saudábeis de avea e plátano

Ingredientes:

• 2 tazas e media de avea
• 1 taza de bebida de améndoa/avea...
• 2 plátanos maduros
• 2 culleradas de sésamo tostado
• 1 cullerada de vainilla

Utensilios: unha cunca, unha culler e un garfo, unha bandexa de forno e papel vexetal.

Elaboración:

Para comezarmos, temos de machacar o plátano co garfo. 

De seguir, engadímoslle a avea, o sésamo.

Tamén a vainilla e a bebida, nós usamos de améndoa. 

Mesturamos moi ben. 

Coa axuda dunha culler imos facendo montóns nunha bandexa de forno cuberta con papel vexetal. 

Enfronamos a 180º, calor arriba e abaixo, durante 23-26 minutos, dependendo de se nos gustan máis, ou menos, crocantes.

Agardamos que vos gusten e que as faigades xa que son moi sinxelas é rápidas de facer. 

O toque de plátano achega o sabor principal mais o toque estrela destas bolachas, canto menos ao noso ver, está na textura, xa que parece que nos imos encontrar con algo crocante e sorpréndenos con todo o contrario. Marabilloso! A desfrutalas, bolboreteir@s!