Lasaña de brócoli, cogomelos e salchichas frescas

Após o prato fresco do pasado sábado, hoxe presentamos un dos nosos pratos preferidos, aínda que tamén nunha outra versión en que integramos pasta, carne, fungos e verdura. Só nos quedou a froita...haha.

Así pois, se xa a lasaña é un prato con moitos hidratos e vitaminas, imaxinade esta. Resulta evidente que a pasta é un dos produtos máis fáciles de manexar e dos que máis se dá para innovar, especialmente a lasagna por necesitar un recheo.

Ademais, como sempre dicimos, cómpre integramos cando for posíbel a verdura nos nosos pratos para lograrmos unha alimentación máis completa. E de haber cativ@s na casa, aínda máis importante :-)

Se xa sodes de lasaña, animámosvos a probardes esta versión, e se non o sodes, pois que mellor que comezar cunha lasaña tan completa. Aquí vos vai a receita:

Lasaña de brócoli, cogomelos e salchichas frescas

Ingredientes (para 4-6 persoas):

• 16 láminas de pasta
• 6 salchichas frescas
• 250 gr de cogomelos
• 1 brócoli grande
• 1 cebola
• 3 dentes de allo
• Salsa bechamel (receita aquí)
• Queixo relado ao gusto
• Aceite de oliva
• Pementa moída
• Sal

Utensilios: prancha, tixola grande, fonte apta para microndas, cazo, culler, coitelo.

Elaboración: 

Para comezarmos temos de preparar a salsa bechamel (receita aquí), para esta ocasión duplicamos as medidas, e preparar as láminas de pasta segundo nos indique @ fabricante; as que utilizamos desta volta ían directamente ao forno.

De seguir, preparamos o recheo. Primeiramente limpamos, e picamos despois os cogomelos, cociñámolos á prancha e engadímoslles un chisco de sal.  Reservámolos nunha cunca.

A continuación, picamos os dentes de allo e a cebola e rustrímolos en dúas culleradas de aceite. 

Engadímoslles o brócoli, tamén picado finamente. Mesturamos ben e tapamos a tixola para que se cociñen antes. Sazonamos con sal e pementa moída.

Cando estean brandiños, mesturámolos cos cogomelos que tíñamos reservados. Reservamos de novo.

Para preparar as salchichas frescas, temos que quitarlles a pel e desfacelas un pouco.

Na mesma prancha en que fixemos os cogomelos, fritimos as salchichas. 

Cando estean preparadas, engadímolas á mestura de brócoli, cebola, cogomelos e allos. Mesturamos moi ben.

E chegou a hora de montar a lasaña! Untamos o molde cunha pouca de bechamel (para que se pegue á pasta) e colocamos unhas láminas de lasaña.

Botamos unha pouca máis de bechamel e engadimos a metade do recheo. 

Tapamos con máis pasta e repetimos o proceso: bechamel, recheo e cubirmos con pasta. 

Botamos o resto da bechamel que nos queda e cubrimos co queixo que máis nos guste; nós utilizamos mozzarella. 

Enfornamos a 200º, calor abaixo e ventilador, durante 25-30 minutos (nos últimos 5 minutos puxemos o gratinador para que se fundira ben o queixo) e xa está lista para degustar!! 

Xa vedes, dificultade mínima e resultado inmellorábel. No caso de non vos gustar algún dos elementos é cuestión de os cambiardes polos vosos preferidos, mais a verdade é que estes ficaron moi ben xuntos. Ademais, esta lasaña havos de dar para varios xantares, ou para un xantar con bastantes comensais, xa que é bastante fartureira. E sobre todo saborosa, moi saborosa.

Cremos que non podedes agardar máis para a probar. Así que se aínda non tedes nada feito para hoxe... que mellor que esta lasaña de brócoli, cogomelos e salchichas frescas. Unha fortísima aperta bolboreteir@s!