Torta San Marcos

Veña... que xa botabamos en falta a nosa especialidade, ou canto menos o que máis nos gusta preparar, as tortas. E hoxe unha torta clásica que tiñamos anotada hai tempo: torta San Marcos. Unha oda ao doce que se remonta ao século XII, onde se elaborou por primeira vez no Convento das Monxas de San Marcos. Xa sabedes a sona que teñen as monxas de reposteiras... E neste caso vaia xoia nos deixaron.

Ten moito de especial esta dozura, como as améndoas nos laterais, a trufa e sobre tomo esa xema á que lle pasamos o soprete, co que, por certo, nos estreabamos. A verdade, é ben cómodo, e o resultado do seu uso ben significativo.

Unha torta así tiña que se corresponder cunha boa celebración e así foi. Elaborámola especialmente para sorprender e agradar a unha moi boa amiga que estaba de aniversario. Parece que @s comensais quedaron satisfeit@s.

Torta San Marcos

Ingredientes (para un molde de 26 cm):

• 1 biscoito xenovés (receita aquí)
• 1 litro de nata 35% materia graxa
• 300 gr de azucre
• 80 gr de cacao en po
• 3 ovos
• Zume de limón

Para decorar:

• 100-120 gr de améndoa 
• Boliñas de chocolate

Utensilios: molde para forno, coitelo, batedor eléctrico ou manual, espátula, cazo e soprete. 

Elaboración:

Para comezarmos temos de elaborar o biscoito xenovés, tedes unha receita aquí, o único cambio foi que utilizamos 5 ovos en lugar de catro. Deixamos arrefriar completamente e coa axuda dun coitelo, ou dunha lira, dividímolo en tres partes coidadosamente.

De seguir, temos de preparar as dúas cremas coa que a imos reencher. Para a primeira delas só temos de montar 500 ml de nata con 60 gr de azucre. Lembrade que a nata debe estar moi fría; eu recoméndovos, refrixerar tamén o batedor. Reservamos no frigorífico.

Para a segunda crema, a trufa, montamos a nata con 60 gr de azucre e o cacao en po. Reservamos no frigorífico. 

Comezamos a montar a nosa torta! Poñemos no prato escollido a capa do medio, ou a superior do biscoito e estendemos a trufa. 

 Tapamos coa capa superior, ou coa do medio do biscoito (depende da que escollerades antes)  e esparcimos unha boa capa de nata, reservando unha pouquiña para os bordos. 

Cubrímola coa parte baixa do biscoito, para que a superficie quede máis plana e a presentación quede mellor, e estendemos polos bordos a nata que reservamos anteriormente. Reservamos no frigorífico mentres preparamos a xema. 

Para prepararmos a xema, temos de bater en frío os tres ovos con 150 gr de azucre.

Despois, colocámolas no lume, que debe estar medio-baixo (sobre o 5-6), e movémolas, coa axuda dunha espátula, até que espesen bastante véndomos como se comeza a despegar do fondo. 

Esténdemos a xema sobre a torta.

Empoamos cos 30 gr de azucre que nos quedan e queimámolo coa axuda do soprete.

Para decorala, colocamos améndoa polos bordos da torta e por riba pomos unhas boliñas de chocolate. Refrixeramos 4-5 horas, aínda que estará máis saborosoa dun día para outro, e xa estaría preparada para comer! 

                                   

Certo é que adoitamos ficar moi satisfeitos coas tortas, mais esta nunca a coméramos e gustounos moitísimo. De feito, decidímonos a facela, despois de tempo no maxín, por ver a súa elaboración no coñecido programa MasterChef. Non podemos comparar pois, con outras tortas San Marcos, mais esta de seguro que vos ha de encantar cando a probedes. E se vós xa a tedes probado, podédes comentarnos como foi despois de a preparardes. Veredes que ben! 

Pasade un bo sábado de sol, e desfrutade desta delicia ideal para as xornadas de festa que se aproximan. Unha forte aperta!