Biscoitiños de cenoria e mazá

Como vai lectores/as? Xa recuperastes do Entroido e das súas larpeiradas?? Por aquí aínda andamos hoxe despedíndonos dos freixós :'( Aínda que vexo difícil agardarmos até o ano que vén por eles, algún día teremos que facer unha homenaxe ao Entroido aínda en datas distantes :-) Por certo, podedes botarlle un ollo ao artigo que escribimos para o xornal Sermos Galiza sobre esta larpeirada entroideira e o seu peso na gastronomía e cultura galega (Artigo Sermos) .

Con todo, as larpeiradas nós nunca as deixamos de lado. Esta semana queriamos facer un doce máis suaviño despois de todo o manducado estes días. Pensamos así nun biscoitiño fresco e lixeiro e no que integrarmos dous produtos que lle dan un sabor... impresionante!

Iso si, a modo de estratexia fixémolos cuns moldes de madalenas porque así talvez é máis sinxelo controlarse á hora de comer as porcións. Porque se o facemos o tamaño tradicional do biscoito arriscámonos a cortar cachos enormes deixándonos levar polo apetito dos ollos. E agora toca controlar un pouco e non exceder, haha. Aí vos vai: 

Biscoitiños de cenoria e mazá

Ingredientes:

• 150 gr de fariña
• 50 gr de manteiga
• 30 gr de azucre
• 4 cenorias
• 2 ovos
• 1 mazá
• 1/2 vaso de leite descremado
• 1/2 sobre de lévedo en po
• Un chisco de sal

Utensilios: pota ou cazo, molde para madalenas, batedor (eléctrico e manual) e unha espátula.

Elaboración:

Para comezarmos, temos de lavar e pelar as cenorias. Cortámolas en anaquiños e cocémolas até que estean brandiñas, aproximadamente 20 minutos. Logo escoámolas e triturámolas. Reservamos. 

De seguir, mesturamos a manteiga, que debe estar en pomada, co azucre. Despois, engadímoslle as xemas do ovo. As claras debémolas montar a punto de neve e reservar. 

A continuación, botamos o leite e a fariña e o lévedo peneirados. 

Agregamos o puré de cenorias e a mazá, cortada en cadradiños pequenos.

Despois, engadimos as claras, e integrámolas con movementos envolventes para que non baixen.

Botamos a mestura nos moldes para madalenas e enfornamos a 160º (o forno debe estar prequente), calor abaixo, durante 25 minutos.

Deixamos que arrefríen un pouco e xa estarían listas para comer! Teñen boa pinta mais saben aínda mellor, uns biscoitos que a nós nos encantan para o almorzo, acompañados dun zume de laranxa. Con todo, están boísimos en calquera momento xa que teñen o punto de dozura necesario para un biscoito mais que o fai máis suave que outros que empachan moito máis. Merece a pena probalos. Podedes facer unha boa cantidade e así xa tedes almorzo para toda a semana, xa que estes biscoitiños tardan bastante en se pór resesos. Unha aperta lambonciñ@s!!