Máis que Semana Santa imos facer desta unha Semana doce porque a receita de hoxe é para @s máis larpeir@s,as napolitanas! Un clásico de todas as pastelarías que podemos optar por realizar nas nosas casas sen lles ter nada que envexar. E desta forma podemos reenchelas do que quixermos, aínda que nós desta vez optamos polo tradicional chocolate, acompañándoo dunhas abelás logrando unha magnífica combinación reposteira.
Canto á orixe desta sobremesa, pois non está tan clara como parece co seu nome. A denominación "napolitanas" fainos pensar na cidade italiana de Napoli, mais polo que parece noutras linguas coñecese como pain au chocolat o que dá lugar a unha posíbel orixe francesa. Teríamos aí un tema do que tirar para unha posíbel investigación gastronómica... :-) Aí vai este riquísimo doce!
Napolitanas de chocolate e abelás
Ingredientes:- 1 masa de follado
- Crema pasteleira de chocolate (a receita está aquí)
- 75 gr de abelás
- 1 ovo
Elaboración:
Para comezarmos, temos de facer a crema pasteleira de chocolate. Cando xa estea preparada engadimos as abelás picadas e mesturámolas ben. Botamos a mestura nunha manga pasteleira e reservamos.
De seguir, estiramos co rolete o follado e cortamos en tiras, de aproximadamente 10 cm de largo. Coa axuda da manga, colocamos dúas tiras da crema nun lado do follado. Pintamos con ovo os bordes e cubrimos a crema coa outra parte do follado.
Enfornamos a 200º, calor arriba e abaixo, durante 15 minutos ou até que o ovo estea dourado. Deixamos enfriar un pouco e perfectas para comer!!
Como vedes non son nada complexas de realizar e o resultado é saborosísimo!! De todas maneiras se non sodes tan lambóns e lambonas coma min podedes optar polas napolitanas salgadas, como aperitivo. Para min, sen dúbida, a mellor forma de as degustas é así, con chocolate... Irresistíbeis!!!
Ningún comentario:
Publicar un comentario