Bolboretas no bandullo: Noodles con tofu crocante

Chegamos tarde, mais chegamos. Nova receita, hoxe de corte asiático e chea de orixinalidade. Ou iso nos pareceu a nós, canto menos.

Xa sabedes da nosa adoración (in crescendo) pola cociña asiática así que sempre andamos a recoller ideas dun lado e doutro para recrear. Pois ben, a combinación noodles+tofu é xa un clásico en diversos restaurantes thai. Mais desta volta pensamos en darlle unha voltiña a este alimento típico da alimentación vegana para lograr para el algo máis de rock&roll. E vaia se o logramos.

Hai moita xente á que non lle gusta o sabor do tofu comido só mais si o que lle outorga a moitos pratos. Pois ben, este, aínda que ten como fin desfacelo e mesturalo cos noodles, logra facerse divertido e saboroso mesmo así de primeiras. Ollo coa idea!

Noodles con tofu crocante

Ingredientes:

Para os noodles:

Noodles de arroz
1 cullerada de pemento doce
1 cullerada de manteiga
Salsa de soia
Aceite de xirasol
Sésamo

Para o tofu:

Tofu firme
4-5 culleradas de salsa de soia
1 culleriña de curry en po
1 culleriña de comiño en po
Maizena
Pan relado
Aceite de xirasol

Utensilios: unha pota, unha tixola (ou un wok), unha táboa e un coitelo, varias cuncas.

Elaboración:

Para comezarmos, temos de secar moi ben o tofu e facemos o adobo. Mesturamos a sioa co curry e o comiño en po.

Cortamos o tofu en barras e bañámolo na mestura anterior. Deixámolo 30-40 minutos.

Escoámolo ben e rebozámolo moi ben en maizena.

De seguir, empoámolo con pan relado. Reservamos.

Cocemos os noodles segundo nos indiquen x fabricante e escoámolos ben.

Botamos na tixola (ou wok) dúas culleradas de aceite de xirasol, a cullerada de pemento doce, a cullerada de manteiga e salsa de soia ao gusto e botamos os noodles. Mesturamos moi ben.