Bo día, bolboreteir@s! Como vai iso? Por aquí con ganas de que chegue mañá xa que poderemos saír tomar o aire un pouquiño por fin co peque. Pouco a pouco.
E mentres, máis lambonadas para vós e para nós, claro. A de hoxe talvez vos soe diferente. Quixemos argallar algo novo, que nunca viramos até o momento. E ao mesmo tempo, é un prato que ten os ingredientes básicos para funcionar de marabilla. A empanada de chocolate veu á nosa cabeza despois de degustar a pizza de chocolate nun napolitano da Coruña. Era un produto de 10, a verdade e pensamos por que non iamos ter unha versión galega tamén. Ademais, xa temos versións doces da empanada con moito éxito como a de mazá.
Así pois, matinamos na preparación para que non fose apenas masa e chocolate. E isto foi o que se nos ocorreu. Adiante!
Empanada de chocolate
Ingredientes:
Para a masa:
Para o recheo:
- 150 g de chocolate
- 80 g de manteiga
- 80 g de azucre
- 2 ovos
- 1 cullerada de vainilla
- Abelás
Utensilios: dúas cuncas, un batedor manual, unha bandexa para o forno e papel vexetal e un rolete.
Elaboración:
Para comezarmos, temos de facer a masa da nosa empanada. Para iso, mesturamos a fariña, a améndoa e o lévedo.
Remexemos ben e agregamos, pouco a pouco, a auga. Queremos unha masa elástica mais un pouco húmida.
Cando estea lista, tapámola e deixamos repousar até que duplique o seu tamaño.
Mentras repousa a masa, facemos a crema de chocolate. Derretimos o chocolate.
Botámoslle a manteiga e mesturamos moi ben.
Agregamos o azucre e a vainilla e integramos ben os ingredientes.
Botamos os ovos, un a un.
E as abelás, ben picadiñas. Reservamos para que espese un pouco.
Estiramos a metade da masa e dámoslle a forma que máis nos guste.
Estendemos a crema de chocolate. Deixade un pouco máis de bordos.
Estiramos a outra metade e tapamos. Pechade ben os bordos para que non se saia o recheo, como nos pasou a nós.
Enfornamos a 210º, calor arriba e abaixo, durante 25 min. Como vedes, a nós abriúsenos un pouco por un lado, porque non sellamos ben os bordos.
Deixamos que se atempere un pouco e xa estaría lista para comer!
Ollade que é tan sinxelo como unha empanada calquera, simplemente ter un pouco de paciencia coa masa. Recomendamos talvez esta empanada para xantares non moi copiosos xa que é unha sobremesa potente. Ou senón, para unha boa merenda.
Ningún comentario:
Publicar un comentario