Ensalada morna de garavanzos con tofu picante

Ola, bolboreteir@s! Tivemos unha fin de semana un tanto enleada e atrasamos a receita para hoxe martes. Estamos a piques de entrar nunha fase moi importante a nivel persoal e tamén a nivel blogueiro e claro, non dá o tempo para todo. Ben, para comer ten que dar si ou si. E para comer ben, tamén!
Pois, seguimos aproveitando os días solleiros e o clima estival para receitas non moi pesadas que nos ofrezan un cúmulo de recursos para o día a día.
Ademais, sumamos unha máis para as nosas receitas veganas, unha alimentación que nos ofrece moitas posibilidades e tamén moito para aprender dela!
Fixádevos a marabilla gastronómica que aquí presentamos.

Ensalada morna de garavanzos con tofu picante

Ingredientes:

• 300 g de garavanzos cocidos
• 250 g de tofu
• 1 aguacate
• 13-14 olivas negras
• 3-4 culleradas de salsa de tomate
• 1/2 culleriña de allo en po
• 1/2 culleriña de comiño
• 1/2 culleriña de ourego
• 1/4 culleriña de pemento picante
• 1 chile
• Pementa moída
• Sal
• Aceite de oliva

Utensilios: unha tixola, unha táboa, un coitelo e unha culler de pau.

Elaboración:

Para comezarmos, tesmos que desmigar o tofu. Reservamos. 

Quentamos dúas culleradas de aceite nunha tixola co chile. De seguir, engadimos o tofu. 

Cociñamoso 2-3 minutos e agregamos o allo, o comiño, o pemento, o ourego, o sal e a pementa. 

Botamos tamén o tomate e mesturamos moi ben. 

Pasados 3-4 minutos, engadimos os garavanzos. 

Apagamos o lume e engadimos o aguacate, cortado en láminas, e as olivas á metade. Mesturamos moi ben. 

 E xa estaría lista a nosa ensalada! 

Agardamos que vos guste e que a poñades en práctica!

Apetecíbel, non é? Pois, animámosvos a probardes e a descubrirdes as posibilidades do tofu, os garavanzos e demais ingredientes desta festa culinaria! Adiante con ela!
Forte aperta, amig@s!