martes, 8 de maio de 2018

Ensalada de fabas

Por aquí estamos a tope coas ensaladas e coas receitas frescas para os días calorosos e aproveitamos cada día solleiro para ampliarmos a colección e termos unha chea de recursos por se nalgún momento enganchamos unha semana seguida de altas temperaturas. Non vaia ser que nos collan cos deberes sen facer e teñamos que repetir receita, haha.
A verdade é que nos presta unha barbariedade preparar este tipo de pratos que nos rouban pouco tempo xa que son moi sinxelos de preparar e que nos achegan múltiplas propiedades.
Imos con esta ensalada de fabas neste martes!


Ensalada de fabas


Ingredientes:

  • 400 g de fabas cocidas
  • 4-5 lascas de pavo
  • 9-10 tomatiños cherry
  • 7-8 olivas
  • 1/2 aguacate
  • 1/2 cebola vermella
  • Unhas poucas abelás
Para o aliño:
  • 2 culleradas de aceite de oliva virxe
  • 1 cullerada de vinagre
  • 1 culleriña de mel
  • 1 culleriña de pirixel
  • 1/2 culleriña de romeu
  • 1 dente de allo
  • Sal

Utensilios: unha táboa e un coitelo, unha cunca e unha fonte para presentar.


Elaboración:


Para comezarmos, facemos o aliño. mesturamos o dente de allo (nós utilizámolo negro, mais pode ser o allo normal) co sal. 


Agregamos o aceite, o vinagre, o mal, o pirixel e o romeu e mesturamos moi ben. Reservamos.


Cortamos os tomatiños á metade, a cebola en xuliana, o pavo e o aguacate en cadradiños pequenos. Poñemos todo na fonte xunto coas fabas. 


Aliñamos e mesturamos moi ben.

Refrixeramos uns minutos para que asenten os sabores e xa estaría lista para comer! 


Agardamos que vos guste e que a faigades na casa!!


Apetecíbel, non é? A nós prestounos moito degustala. Influíu tamén o feito de ir un día moi bo.
Quédavos entón esta receita sorprendente pola presenza das fabas nun prato frío e tan fresco coma esta. Forte aperta, bolboreteir@s! 

1 comentario:

  1. No me veis pero no he dejado de haceros la ola , me encanta no lo siguiente al final me van a faltar comidas en el dia para poder hacer todo lo que veo y se me antoja , esta ensaladita caera pronto me encantan todos los ingredientes y ese aliño con el ajo negro y romero le tiene que ir de miedo.
    Bicos mil y feliz semaa wap@s.

    ResponderEliminar