Pisto

Como ides vendo, nesta tempada non paramos de lle tirar proveito a todo o que provén da horta, especialmente tomates e pementos, que están a vir en cantidades inxentes.

Nós somos moi daquelas receitas en que todo o protagonismo recae nas verduras e entre estas o pisto é unha das clásicas que aínda nunca probaramos. E como é que non o prepararamos até agora? Pois tampouco sabemos darlle resposta pois é un grande recurso de validez diaria. 

É moi común en todo o territorio peninsular aínda que parece que comezou a cociñarse na Mancha a partir dos produtos que ían recollendo da horta. 

Aínda que o fundamental no pisto son os pementos, tomates e cabaciñas a verdade é que hai moitísima variedade canto ás elaboracións aínda que en Bolboretas no bandullo optamos pola tradicional para comezar. Iso non quita que vaiamos ir probando novas combinación a partir da idea primixénea. De momento, imos desfrutar desta :-)

Pisto

Ingredientes:

• 250 g de salsa de tomate
• 1 cabaciña
• 1/2 pemento verde
• 1/2 pemento vermello
• 1 cebola
• 2-3 dentes de allo
• 1 chile (opcional)
• Aceite de oliva
• Pementa moída
• Sal

Utensilios: unha tixola, unha táboa e un coitelo e unha culler.

Elaboración:

Para comezarmos, rustrimos os dentes de allo e o chile en 3 culleradas de aceite. 

Cando se comece a dourar, engadimos a cebola, cortada finamente. 

E os pementos, tamén cortados en cadrados pequenos. 

Cando a cebola e os pementos estean rustridos, engadimos a cabaciña, picada finamente. Salpementamos ao noso gusto. 

Cociñamos 10-15 minutos e agregamos a salsa de tomate. Mesturamos ben e rustrimos 15 minutos máis. 

E xa estaría preparado para comer!!! 

Agardamos que vos guste e que o poñades en práctica 😉

Para @s que gustades da verdura pouca explicación vos teremos que dar pois tendo unha boa materia prima, como neste caso, aseguramos o goce culinario. Viva a hora e viva os produtos da nosa terra. 

Forza e sabor para esta nova semana, bolboreteir@s!!