martes, 27 de xuño de 2017

Paté de cenoria

Boas, bolboreteir@s! Como levades esta última semana de xuño. Como pasa o tempo, verdade! Xa nos imos meter de cheo no verán aínda que por aquí aínda non tocan vacacións. Para iso faltan un par de semanas.
E facemos máis saborosa a espera con receitas como a de hoxe, un PATÉ DE CENORIA! Porque adoramos o veganismo e as súas múltiplas posibilidades creativas. Quedámonos con esta porque supón unha alternativa ao paté clásico que, se somos sinceros, sempre nos deu un pouco de mal rollo desde que escoitaramos a mítica historia do fígado inflamado, grrrrrr...
Mais con patés vexetais coma este, só hai que pensar en desfrutar porque o que é a elaboración... tampouco ten moita ciencia como veredes. Aí vai:


Paté de cenoria


Ingredientes:

  • 4-5 cenorias
  • 1 cullerada de curry
  • 1 culleriña de coantro
  • 1 culleriña de ourego
  • 1 culleriña de sésamo
  • 1 cullerada de aceite
  • 1 cullerada de limón
  • 1 culleriña de auga

Para decorar: 1 cullerada de aceite, sésamo. 


Utensilios: unha cunca, un microndas, un coitelo, unha culler, unha culleriña, papel transparente e un batedor eléctrico. 

Elaboración: 


Para comezarmos, temos de pelar as cenorias e cortalas en anacos. Botámolas nunha cunca apta para microndas, engadimos unha culleriña de auga e tapámolas con papel transparente. Metemos no microndas 6 minutos. 

A continuación, engadimos o curry, o ourego, o coantro, o sésamo, o aceite e o limón. Trituramos moi ben. 


Servimos nun vaso ou un bote de cristal, engadimos o aceite e o sésamo. 


E xa estaría listo para comer! Podémolo comer con tostadas, picos, verduras.... 


 Agardamos que vos guste e que o faigades na vosa casa porque, como puidestes ver, é moi sinxelo e está delicioso 😉


Nós aproveitámolo como aperitivo, mais como merenda cun pan de molde ou cunha torrada tamén ha de entrar moi ben. Ademais, despois de o metermos no frigo ganará en intensidade e sabor para nos refrescar estas tardes que veñen. Fica convosco unha nova idea, amig@s. Fortísima aperta!

2 comentarios:

  1. Uummmmmmmmmmm pintaza tiene ese pate de zanahoria y seguro que sabe mejor ,una pena no poder meter la mano y rellenar un taper ,os ha quedado de relujo.
    Bicos mil wap@s.

    ResponderEliminar
    Respostas
    1. Asegurámosche que está delicioso (estouno merendando agora mesmo) 😉😉! Seguro que che encantaría!!
      Bicos e grazas por pasarte!

      Eliminar