Torta de queixo e chocolate

Aínda que é verdade que nestas semanas estamos preparando e sustentando a nosa alimentación con receitas maioritariamente saudábeis, non podemos deixar de lado a nosa especialidade e paixón: os doces. Así pois, hoxe traémosvos unha torta que preparamos hai dúas semanas para unha encarga dun aniversario. Pensamos que non iamos poder probala mais reserváronnos unha porción e descubirmos o resultado para vos confirmar que se corresponde coa apariencia.

Unha larpeirada con dous produtos estrela como o queixo e o chocolate aínda que canto a sabor, o segundo é o principal protagonista mentres que o primeiro dá un toque fundamental para a textura, tan esponxosa...

Ás veces vemos tortas moi apetecíbeis na rede, mais @s temeros@s adoitan pensar no traballo que requiren. Cómpre animalos a pórse mans á masa porque despois todo vén dado, sen apenas dificultades. E senón, ollade que sinxela!

Torta de queixo e chocolate

Ingredientes:

Para a base:

• 400g de galletas
• 100g de manteiga
• 2 culleradas de cacao puro

Para o recheo:

• 1250g de queixo mascarpone
• 300g de chocolate con leite
• 150g de chocolate negro
• 3 culleradas de azucre glas

Para a decoración:

• 150g de chocolate con leite
• 80g de chocolate branco

Utensilios: un molde desmoldábel, unha picadora, unha cunca, unha manga pasteleira, unha espátula e unha culler de pau. 

Elaboración:

Para comezarmos, temos de facer a base da torta. Para iso, picamos as galletas coa axuda da picadora (ou dunha bolsa e un rolete). 

Engadímoslle a manteiga derretida e o cacao en po. 

Mesturámolas moi ben e estirámola sobre a base do molde. Refrixeramos.  

Agora pasamos a facer o recheo. Comezamos batindo o queixo co azucre. 

Derretimos os dous chocolates e imos integrando o queixo ao chocolate. 

Estiramos esta crema sobre o molde e refrixeramos 3-4 horas. 

Pasado ese tempo, temos que decorar a torta. Derretemos o chocolate con leite e botámolo sobre o molde, imos movendo o molde para que se cubra ben a torta. 

De seguir, derretemos o chocolate branco, metémolo nunha manga pasteleira e cortamos a punta. Imos facendo liñas sobre a  torta e, unha vez feitas, coa axuda dun garfo ou un coitelo, facémoslle formas unindo as liñas brancas. 

Refrixeramos até que endureza o chocolate e xa estaría lista para comer!! 

Ben, cómpre recordar que sempre que teñades dúbidas na elaboración dun prato, xa sexa antes ou durante a elaboración, non tedes máis que nos enviar unha mensaxe por Facebook, Twitter, Instagram ou por correo electrónico (bolboretasnobandullo@gmail.com). Xa sabedes que nós estamos encantadísimos que de nos formuledes as vosas preguntas ou suxestións. Adiante!