Bolo-pizza de pepperoni

Bolboreteir@s!!! Como vai todo? Agardamos que moi ben e senón pois procuraremos que vai mellor pondo un pouco de sabor por aquí.

Xa vos contamos algunha que outra vez que somos adictos a estes vídeos breves de "tasty" e demais que logran a través da información rápida e de imaxes poderosas potenciar o noso interese gastronómico. Pois houbo un prato que nos chamou a atención porque poñía en xogo dous produtos que adoramos como o pan e a pizza dun xeito novidoso.

Nós recollemos a idea e facemos as modificación correspondentes para o noso padal quedando un bolo-pizza contundente e ben saboroso.

O ideal xa sería facer a propia bola na casa, mais estas semanas andamos con moi pouco tempo así que optamos por unha mercada. E despois... a reencher a gusto do consumidor, haha.

Bolo-pizza de pepperoni

Ingredientes:

• 1 bola de pan
• 2 bolas de mozzarella
• Queixo relado ao gusto
• 15 lascas de pepperoni
• 3-4 lascas de salame
• 2-3 champiñóns
• 1 pemento
• 1/2 cebola

Utensilios: bandexa de forno, papel vexetal e papel de aluminio.

Elaboración:

Para comezarmos, temos de abrir a bola de pan por arriba. 

A continuación, quitámoslle toda a miga (aproveitarémola noutra receita ;)). 

De seguir, estendemos unha fina capa de salsa de tomate. 

Cortamos en lascas unha bola de mozzarella e poñémolas no fondo. 

Cubrimos co pepperoni. 

Despois, botamos os champiñóns en lascas e o pemento e a cebola cortados en anacos. 

Cubrimos as verduras co salame. 

Estendemos, de novo, outra capa de salsa de tomate e a outra bola de mozzarella en lascas. 

Agregamos o queixo relado. 

Cubrimos o pan coa tapa. 

Envolvemos a bola con papel de aluminio e poñémoslle un peso encima durante 20-25 minutos, para que quede máis aplanada. 

De novo, engadimos un chisco de queixo relado e 6-7 lascas de pepperonni.

Enfornamos, nunha bandexa de forno cuberta con papel vexetal, a 170º, calor arriba e abaixo, durante 25-30 minutos. Ollade tamén a cocción do voso pan, para que non se pase de máis. Talvez necesite uns minutos máis ou menos.

E xa estaría preparada para comer!! Que aproveite!

A apertura desta bola convértese nun momento artúrico coa descuberta dunha paisaxe gastronómica chea de sabores e cores en boa cantidade. Ollo, un anaco desta pizza non supón o mesmo que un anaco das tradicionais. Isto ocupa un lugar no bandullo, importante, haha.

Estaba clarísimo que ía saber ben así que pouco risco había. Agora si, o que nos interesa é ver como vos animades a preparar esta bomba e que resultado vos dá.

Agardamos novas vosas. Apertas agarimosas, amig@s!