Polo con salsa iogur

Para quen ben nos coñece, xa sabe que unha das nosas grandes referentes é Isasaweis, así que de vez en cando aproveitamos para elaborar algunha das súas fantásticas receitas. E a que escollimos desta volta, foi esta. Aproveitamos que tiñamos a maioría dos produtos na casa, comezando polo polo, unha  das carnes de que máis gustamos e máis recorrente na nosa casa. E canto ao resto, chamounos a atención polos elementos tan opostos que entran en xogo neste prato: soia, limón, mel, iogur, pemento...

E coma sempre, para diante, a ver que sae.

E ben saíu, tan ben que se nos fixo escasa a ración preparada e quedamos con ganas de máis. De feito, hoxe ou mañá habemos de repetir para matar esas ansias, haha.

Ademais, este prato de seguro que vos resulta novidoso e dificilmente comparábel con calquera probado anteriormente. Podedes probar primeiro. Cando vexadas canto vos gusta, de seguro que o queredes facer para tod@s @s vos@s convidad@s.

Polo con salsa iogur

Ingredientes (para unha ración):

Para o polo:

• 1 peituga
• 2 culleradas de aceite de oliva
• 2 culleradas de salsa de soia
• 2 culleradas de zume de limón
• 1 culleriña de pemento doce
• 1 "     "      de pemento picante
• 1 "     "      de ourego
• 1 "     "      de allo en po

Para a salsa iogur:

• 1 iogur natural
• 1 culleriña de mel
• 1 culleriña de mostaza doce
• a reladura dun limón

Utensilios: unha cunca grande e unha pequena

Elaboración:

Para comezarmos, temos que facer o adobo da peituga. Para iso, mesturamos o aceite, o zume de limón e a soia.

De seguir, engadimos o pimentón, tanto o doce coma o picante, o ourego e o allo. Mesturamos moi ben. Reservamos.

A comtinuación, cortamos as peitugas en anacos e botámoslles o adobo, mesturamos moi ben e deixamos repousar, como mínimo, 30 minutos.

Mentres tanto, facemos a salsa de iogur. Mesturamos o iogur natural coa reladura de limón, o mel e a mostaza. Reservamos.

Despois, nun tixola ben quente, fritimos a peituga, tardaremos 5-6 minutos.

Servimos no prato acompañada da salsa de iogur e xa está lista para comer. Que aproveite!!

Vese apetecíbel, verdade? Séndomos sinceros, o propio polo sen a salsa, xa está de morte posto que adquire todos eses matices do adobo. Brandiña, con máis sabor do normal e moi agradábel de degustar. Mais claro, ese mollo non pode quedar como simple espectador. Quere participar da acción e aí é cando veñen as emocións fortes. Contraste brutal só apto para atrevid@s. Vós sodes atrevid@s? Mil millóns de apertas!!