Salsa boloñesa vegana

Ola, amig@s! Traemos hoxe unha receita ben clásica e ao tempo, ben diferente. Xa vos dixemos moitas veces o que gustamos da alimentación vegana. Non a seguimos mais botamos man dela en moitas ocasións pola creatividade que ofrece e tamén polas múltiplos beneficios nutritivos. Coñecemos produtos e sobre todo descubrimos resultados tan sorprendentes como o que hoxe presentamos.
Fomos algo desconfiantes no inicio porque viamos xente na rede que cuestionaba o sabor da soia por si soa. Para nós era a primeira vez mais ficamos moi moi contentos co seu sabor. É moi suave e cunha textura moi similar á da carne picada. Vaia, por que non botarmos man dela con máis frecuencia! Aí imos!

Salsa boloñesa vegana

Ingredientes:

• 250 g de soia texturizada
• 300 g de salsa de tomate
• 1 brócoli
• 2 cenorias
• 1/2 cebola
• 2 dentes de allo
• Caldo de verduras/auga
• Aceite de oliva
• Ourego
• Pementa moída
• Sal

Para acompañar: pasta ao gusto, patacas, tortillas...

Utensilios: unha cunca, unha tixola e un picador eléctrico (ou táboa e coitelo).

Elaboración:

Para comezarmos, temos de rehidratar a soia. Para iso, botamos a soia nunha cunca e cubrimos con caldo de verduras (ou con auga).

 

Mentres tanto, trituramos as cenorias, a cebola e os dentes de allo e rustrímolos nunha tixola con dúas culleradas de aceite. Salpementamos ao noso gusto.

Pasados 5 minutos, engadimos o brócoli, tamén cortado finamente, para que sexa máis sinxelo de comer.

Cando o brócoli estea cociñado, agregamos a soia, ben escoada, e mesturamos moi ben.

Botamos a salsa de tomate, mellor se é caseira, e cociñamos 4-5 minutos máis.

Se o combinamos con pasta, cocémola seguindo as instrucións do paquete mesturámola coa salsa. E xa estaría lista para comer! Agardamos que vos guste!

Oxalá a poñades en práctica e vos encante, como nos pasou a nós. Aquí sempre dicimos que imos recrear unha e outra vez moitas receitas. Despois non dá tempo a todas porque temos que seguir achegando novas ideas. Mais temos clarísimo que esta estará si ou si. Marabilla!
Mil grazas polas vosas lecturas, bolboreteir@s! Forte aperta!