Verduras á crema

Bo día, as receitas non paran e nós seguimos argallando en novas ideas como a que hoxe vos presentamos.

Esta semana, con motivo do Sant Jordi, chegounos un novo libro de Isasaweis, unha das nosas autoras favoritas e dando unha primeira ollada xa chegamos a unha das súas marabillas que nos serviu para nos inspirar e crear esta delicia que hoxe vos traemos a Bolboretas no bandullo. 

Unha vez máis damos todo o protagonismo ás verduras, destacándomos as espinacas, polo que nos aseguramos un prato ben apetecíbel. Cremos que xa vos dixemos unhas cantas veces o que nos fan perder a cabeza esta tipo de verduras.

Ides ver que achegamos algunha proteína a través dos champiñóns para facermos máis completa a receita. Desta forma imos ter as ceas máis saborosas! A por ela!

Verduras á crema

Ingredientes:

• 400- 500 g de espinacas
• 250- 300 ml de leite evaporado
• 4-5 champiñóns grandes
• 3-4 culleradas de améndoas
• 2 queixiños
• 1 cebola
• 1 dente de allo
• 2 culleradas de aceite
• Pementa moída
• Sal
• 
  

Utensilios: unha tixola, unha culler, unha táboa e un coitelo.

Elaboración:

Para comezarmos, rustrimos o dente de allo, cortado en láminas, en dúas culleradas de aceite.

Engadimos a cebola cortada en xuliana. 

E tamén os champis, lavados e cortados en lascas. Deixamos que se cociñe todo 5-6 minutos. 

Engadimos as espinacas e mesturamos ben. 

Cando se integren ben, engadimos os queixiños e o leite evaporado. 

Tamén a améndoa e mesturamos ben. Deixamos que se cociñe todo xunto, aproximadamente, 15 minutos. 

E xa estarían listas para comer! 

Agardamos que vos gusten e que as fagades xogando coas verduras que máis vos gusten ;). 

Vaia homenaxe nos demos, amigos! Sabor, sabor e máis sabor nun prato que satisfai a unhas e outros. Agora que xa sabedes os pasos... que tal se vos animades? Adiante coa nova receita! Forte aperta!