Pastel de carne

A receita que hoxe vos presentamos tamén se caracteriza pola súa sinxeleza e rapidez ademais de ser un prato de moi boa presentación. Resulta moi apropiada eses días en que temos convidad@s ou para días de festa xa que non precisa moito tempo de preparación por ser o forno quen fai o traballo mías laborioso. Acostuma gustar a todas as persoas alén de ser un alimento moi completo por nos ofrecer proteínas, incluír un pouco de verdura e mesmo calcio. Ademais o sabor é... mmmmm... exquisito!

Pastel de carne

Ingredientes:

Para o pastel:

•  700 gr de carne picada
• 14-15 liscos de beicon
• 4 liscos de queixo 
• 4 pementos do piquillo
• Tortilla francesa dun ovo
• Sal, pementa moída, ourego e alfábega

Para a salsa:

• 1 cebola
• 1 cenoura
• 1 pemento vermello pequeno
• Sal, pementa moída, viño branco e brandy

Elaboración:

Para o pastel de carne:

Temos de colocar nun molde os liscos de beicon de forma que sobresaia polo bordo, para poder cubrimos despois a torta. No fondo, e sobre o beicon, estendemos unha capa de carne picada (previamente sazonada co sal, a pementa, o ourego e a alfábeca), sobre esta, o queixo, os pementos e a tortilla francesa. Para finalizar, botamos outra capa de carne picada e cubrimos co beicon. Enfornamos a 180º (calor arriba e abaixo, co ventilador) durante 1 hora ou 1 hora e media.

Para a salsa:

Picamos a cebola, a cenoura e o pemento en anacos pequenos (neste caso, non é necesario que os cortemos moi miúdos) e rustrímolos nunha tixola cun pouco de aceite. Cando abranden un pouco, botamos un chorriño de viño e outro de brandy e deixamos que reduzan. A continuación, trituramos todo co batedor.

Servimos a carne acompañada da salsa. Os ingredientes que utilizamos para a elaboración da salsa podédelos modificar ao voso gusto, con tomate, cabaciña... ou mesmo con champiñóns ou setas.

Bo proveito!! De facerdes esta riquísima receita, non esquezades enviarnos as vosas fotos a bolboretasnobandullo@gmail.com. Que manduquedes felizmente! :-)