Katsu curry de berenxena

 Bo día, bolboreteirxs! Que tal o inicio de xuño? Aquí estamos unha semana máis compartindo con vós receitas. Sabemos que fallamos a semana pasada, mais estas últimas semanas no insti están sendo un pouco loucura. Hoxe traémosvos unha nova versión do Katsu curry, desta volta, vegano. Vímosllo hai uns días a La Gloria Vegana e tívonos tan boa pinta que decidimos facelo. A verdade é que queda moi rico e as berenxenas así son espectaculares, quedan moi moi crocantes. De feito, fixemos de sobra e témolas conxeladas para que nos saquen dun apuro.

No blogue xa tedes outra receita de Katsu curry e así podedes escoller a versión que máis vos guste!

Aquí vos deixamos a receita! 

Katsu curry de berenxena

Ingredientes:

Para as berenxenas

• 1 berenxena
• 100 ml de auga    
• 80 g de fariña
• Pan relado groso        
• Sal

Para a salsa de curry:

• 400 ml de leite de coco
• 1 cullerada de curry
• Allo
• Xenxibre
• Pementa moída
• Sal
• AOVE

Para acompañar:

• Arroz branco

Utensilios: dúas tixolas, táboa e coitelo, varias cuncas, papel de cociña, unha culler de mestura e un garfo.

Para comezarmos, temos de facer a salsa de curry. Para iso, rustrimos en dúas culleradas de AOVE o allo e o chisco de xenxibre. 

Agregamos o curry e mesturamos moi ben. 

Botamos o leite de coco e mesturamos. 

Cociñamos 10-15 minutos até que reduza a salsa. 

Mentres tanto, preparamos as berenxenas. Pelámolas, cortámolas en lascas e poñémolas nun prato con abundante sal para evitar que queden amargas durante 5 minutos. 

Secámolas ben con papel absorbente. 

Mesturamos a fariña e a auga até ter unha crema homoxénea. 

Mergullamos as lascas de berenxena. 

Empoámolas con pan relado. 

E frítimolas en abundante AOVE. 

Poñémolas sobre papel vexetal para eliminar o exceso de AOVE. 

Cando teñamos a salsa máis as berenxenas, servimos no prato, acompañando de arroz. 

E xa estaría listo para comer! 

Ten boa pinta, verdade? Aquí tedes unha nova forma de comer berenxenas! Oxalá vos guste e a poñades en práctica!

Lémonos pronto!

Aperta forte, bolboreteirxs!