Bo día, bolboreteir@s! Sen apenas nos decatar, metémonos xa en abril. É incríbel como voa o tempo. Xa nos dicían sempre que esta sensación aumentaba a medida que medrabamos aínda que daquela parecían contos de "maiores", coma sempre. E tamén coma sempre, o tempo dá a razón a quen a ten.
Mimá, puxémonos con topicazos para falarmos de ovos. Pero ollo, os ovos recheos sonvos unha delicatessen sen igual. Ou canto menos estes que a nós nos deixaron sen palabras. Iso si, tiñamos o capricho do aguacate e aguacate levaron. Velaquí os tedes.
Ovos recheos de aguacate e bonito
Ingredientes:
- 4-5 ovos
- 1 lata de bonito
- 1 aguacate
- 1 tomate
- 1/2 cebola
- 8-9 olivas
- O zume de 1/2 limón
- Pementa moída
- Olivas e ourego para decorar
Utensilios: unha pota, un coitelo, un garfo, unha culler, unha cunca e un prato.
Elaboración:
Para comezarmos, temos de cocer os ovos en abundante auga fervendo durante 10 minutos. Un truco para que queden perfectos é botarlle á auga un chisco de sal e unha cullerada de vinagre, así, se rompen, conseguimos que conserven a forma igual. Cando os teñamos listos, metémolos en agua fría e esperamos a que se temperen. Cando arrefríen, pelámolos, cortámolos ao medio e retiramos a xema. Reservamos.
Mentres tanto, preparamos o recheo. Trituramos o aguacate, coa axuda dun garfo, co zume do limón e un chisco de pementa, engadimos o bonito e as olivas cortadas en lascas.
Agregamos a xema e mesturamos de novo.
Picamos o tomate e a cebola e picámolos finamente. Engadímolo tamén á mestura anterior.
Reenchemos a metade dos ovos e decoramos con máis olivas e un chisco de ourego. Refrixeramos 1-2 horas. E xa estarían listos para comer!
Agardamos que vos guste e que os poñades en práctica.
Estas receitas sempre triunfan, especialmente no verán cando comezan a apetecer máis receitas fresquiñas. Non son o prato máis fermoso do mundo mais non vos hai moitos petiscos moito máis saborosos. Seguro que vós xa tedes outras moitas variantes. Contádenos e despois facemos comparanzas. Aperta lambona, bolboreteir@s!
Ningún comentario:
Publicar un comentario