Na Mesa de Natal Não Pode Faltar: Roscón de chocolate

Menin@s! Lanzáronnos un reto desde Portugal para este Nadal e nós recollímolo con moi bo gusto pois adoramos esta época do ano no que a gastronomía xoga un papel tan relevante.  A idea xurdiu de A casinha das bolachas con quen xa colaboramos na nosa sección "Bitácoras de aquí e acolá". Ben, pois desde comezo de mes, diferentes blogues nominados están a publicar receitas natalicias e a responder a un cuestionario que Ana nos preparou. Estamos acostumados a preparar nós as receitas para o Bolboreteando aínda que desta volta tócanos o papel inverso, o de responder.
Deixámosvos pois con este fermoso reto e cunha receita especial para chocolateir@s nestas vindeiras datas.

Na Mesa de Natal Não Pode Faltar... 

• Quem está por de trás deste blogue?
• Diana e David, unha parella de filolólogos, namorados desde 2005, con paixón pola gastronomía. 
• Quando surgiu o gosto pela culinária?
• É continuo e progresivo desde a infancia, adoptando un papel activo nos últimos 8 anos.
• Quando e como surgiu o blogue?
• O 30 de decembro de 2013, para combinar as dúas paixóns, as letras e a gastronomía. 
• Gostas desta época do ano? Se sim do que mais gostas?
• Si, nesta época desfrutamos moitísimo, tanto do ambiente natalicio, do clima, coma das receitas típicas. 
• Existe algum ingrediente que te faça lembrar o Natal? Qual?
• Si, en xeral o azucre e o chocolate están moi presentes nesta época, mais tamén o marisco.
• Costumas cozinhar no Natal?
• Si, é un grande pracer para nós cociñar nestas datas importantes.
• O que nunca pode faltar na tua mesa de Natal para além de muito amor?
• Un pouco de marisco, e uns bos doces natalicios para a sobremesa.
• Que receita vais partilhar e porque razão a escolheste?
• Un Roscón de chocolate, porque aquí son moi tradicionais nos días 5 e 6 de xaneiro e queríamos ofrecer unha versión máis doce co chocolate. 

Roscón de chocolate

Ingredientes:

Para a masa do roscón:

• 400 g de fariña de forza
• 180 ml de leite
• 100 g de azucre
• 60 g de manteiga
• 30 g de cacao puro
• 21 g de lévedo fresco
• 3 ovos
• 1 cullerada de vainilla
• Un chisco de sal

Para a decoración:

• 150 g de chocolate
• 150 g de nata 35%
• 25 g de manteiga

Utensilios: unha cunca grande, un batedor manual (ou culler ou espátula), papel vexetal, papel transparente e unha bandexa de forno. 

Elaboración: 

Para comezarmos, temos que quentar o leite coa cullerada de vainilla. Reservamos até que esté morno e engadimos o azucre e o sal. Reservamos.

Despois, mesturamos a fariña, co cacao e o lévedo. 

Engadimos os dous ovos batidos. 

Mesturamos moi ben. Cando teñamos unha masa homoxénea, colocamos sobre papel vexetal e seguimos amasando. 

Agregamos a manteiga, e mestuamos até que estea completamente integrada. 

Cando estea lista, colocamos, de novo, a masa á cunca, cubrimos con papel transparente e deixamos repousar até que duplique o tamaño, aproximadamente 1 hora.

Pasado ese tempo, sacamos a masa a unha superficie enfariñada (con cacao ou fariña, se usades fariña, hai que ter coidado para que non quede moi manchado o roscón) e dámoslle a forma de roscón. 

Este sería o momento se queremos meter algunha sorpresa, só a teríamos que envolver en papel de aluminio e agachalo ben dentro do biscoito. Deixamos repousar 30-40 minutos e pintamos o biscoito co outro ovo batido. 

Enfornamos a 190º, calor abaixo e ventilador, durante 25 minutos. Despois, reservamos até que arrefríe.

Pasado ese tempo, temos que quentar a nata até que ferva, retiramos do lume e engadimos o chocolate. Mesturamos moi até que se derreta, de seguir, agregamos a manteiga e remexemos até que teñamos unha crema lisa e brillante. 

Vertémolo sobre o biscoito.

E decoramos cunhas bolas de chocolate. 

Deixamos que arrefríe e endureza o chocolate e xa estaría listo para comer!

Agardamos que vos guste e que o poñades en práctica este Nadal. 

Cremos que logramos unha moi boa alternativa ao tradicional pan de ovo preparado para o Día de Reis e que podemos ter en conta en función das preferencias dos nosos comensais. A idea recollímola do novo libro de Alma Obregón e quedamos gratamente sorprendidos. Aínda teriamos a opción de rechealo mais este xa de por si é ben saboroso e intenso.

Sexa como for, deixámosvos aquí tamén a receita do tradicional Rosco de Reis que tanto éxito tivo no noso blogue: Receita.

Agardamos que desfruten por Galiza, Portugal desta receita natalicia. Pasen unhas moi boas festas... Lémonos mañá de novo!