Bolboretas no bandullo: Gofres belgas

Ola, ola!! Hoxe chegamos cedo porque así collémosvos coa primeira lectura do día, ideal para facer fame.

Traémosvos unha larpeirada que adoramos e que resulta ideal para un almorzo ou merenda festiva. Así que... hoxe, sábado, que che parece darte unha homenaxe xa de boa mañá.

A verdade é que os gofres son destes produtos que incomprensibelmente non comiamos até hai uns anos en que nos deu por probar un e alucinamos. De seguro que a vós tamén vos ten pasado con algo que tiñades marxinado da vosa alimentación até que... guau!

E hoxe imos cunha nova versión desta lambetada. A orixe dos gofres adoita dicirse que é estadounidense mais en Bélxica non están nada de acordo e atribúense a eles o mérito desta creación. Así que o xusto era traer as dúas variantes. Ficaba esta. Aí vai!

Gofres belgas

Ingredientes:

Para a masa de arranque:

200 g de fariña
125 ml de leite
4 g de lévedo de panadaría
1 cullerada de azucre
1 ovo

Para a masa:

120 g de manteiga
60 g de fariña
2 culleriñas de mel
6-7 culleradas de azucre

Para acompañar:

Crema de cacao
Crema kinder
Marmeladas
Boliñas de chocolate

Utensilios: unha cunca grande, un batedor e unha gofreira.

Elaboración:

Para comezarmos, temos de facer a masa de arranque. Para iso, mesturamos a fariña co leite (morno), o lévedo, o azucre e o ovo.

Deixamos que repouse a masa uns 30 min, aproximadamente.

Pasado ese tempo, agregamos a fariña e o mel.

Cando estean integrados, botamos, pouco a pouco, a manteiga, que ten que estar en pomada. Cando todos os ingredientes estean integrados, deixamo repousar 1 hora, aproximadamente.

Agora, estiramos un pouco a masa e imos agregando o azucre, pouco a pouco.

Repartimos a masa en boliña. Nós pesamos a masa e despois dividimos en 8 boliñas.

Quentamos a gofreira e imos facendo os gofres. No caso de non terdes gofreira podería tentarse nunha máquina de facer sándwichs. Non é o mesmo, mais podemos obter un resultado interesante.